Hurts спелі пра беларускую дзяўчыну з незайздросным лёсам

Брытанскі гурт Hurts выдаў новую песню з назвай "Rolling Stone". У ёй распавядаецца пра беларускую дзяўчыну ў незайздросным лёсам: "Яе бацька быў алкаголікам, а маці жывёлай. Яна была начной птушкай і танчыла go-go для буржуазіі. А цяпер яна жыве як rolling stonе".

Нагадаем, Hurts тройчы наведалі Беларусь: у 2011 годзе яны выступілі ў Палацы спорту, у 2013 годзе — на фестывалі "Мост". У тым жа годзе яны тайна з'явіліся на "Ліні Сталіна" і сыгралі сэт на закрытым карпаратыве кампаніі World of Tanks у гонар яе 15-годдзя. Відавочна, што візіты ў Беларусь пакінулі ў музыкаў глыбокі след. 

Сінгл "Rolling Stone" анансуе трэці паўнафарматнік гурта, "Surrender", які выйдзе 9 кастрычніка. 

Вось як выглядае тэкст песні ў перакладзе на беларускую:

У Вероне, адкуль мы вядзем свой аповед,

Джульета на каленях.

Яна страляе, каб забіць, і мае мэтаю некага задаволіць.

Ты можаш бачыць гэта ў яе вачах.

Яна не хавае гэтага.

Яна не любіць адзіноты.

Таму ты дзякуеш ёй за чароўнасць,

Бярэш яе ў рукі.

І яна проста не дасць табе сысці.

Яна кажа, што яе бацька быў алкаголікам,

А маці — звяругай.

І цяпер яна як перакаці-поле.

Яна кажа, Бог ніколі не забярэ яе да сябе,

Калі ты адвязеш яе дадому.

У Беларусі яна была начной птушкай.

Яна танцавала гоў-гоў для буржуяў.

А цяпер яна тут,

І яна стаіць на каленях.

І яна не выбачаецца

За свой падман.

Але яна так больш не можа.

Ты можаш убачыць гэта ў яе вачах.

Яна заб'е іх, калі яны паспрабуюць паслаць яе назад, у магілу.