Гурт Glofira прэзентуе кліп паводле апавядання Чака Паланіка (відэа)

Гомельскія альт-рокеры Glofira знялі першы афіцыйны кліп на песню “Седатив” з апошняга альбома гурта “Всё О.К.”. Рэжысёрам і аўтарам ідэі выступіў Іван Лучшы, вядомы па ранейшым супрацоўніцтве з гуртом Happy Face. Яго прапанову, зрабіць відэашэраг паводле апавядання Чака Паланіка “Цёплы дождж”, музыкі адразу падтрымалі. Праўда, празмерная адкрытасць выніковага варыянту іх спужала.

“Само апавяданне дастаткова стромнае, — тлумачыць лідар Glofira Сяргей Сочнеў. — Там жанчына і мужчына не наладжваюць стасункі і ў выніку займаюцца ананізмам. Іван гэта рэалізаваў вельмі адкрыта. Нам не спадабалася, як успрымаецца сюжэтная лінія. Яна падалася вельмі наіўнай і пахабнай. Іван з гэтым пагадзіўся і мы вырашылі знайсці дадатковую сюжэтную лінію. Плюс, я спадзяваўся паказаць кліп на тэлебачанні, але з такімі сцэнамі шансаў не было”.

Дапрацоўвалі відэа паўгода. Іван Лучшы даўно хацеў зняць працу мастачкі Анастасіі Варанцовай, якая афармляла альбома Glofira “Всё о.к.”. Дарэчы, менавіта кадры працы над вокладкай дыска і трапілі ў канчатковы варыянт кліпа. Ролі галоўных герояў выканалі сябры музыкаў Паліна Ганецкая і Філіп Квач.

Цяпер музыкі плануюць канцэртную прэзентацыю першага відэа і працуюць над новым матэрыялам. Напрыканцы вясны Glofira збіраецца выдаць сінгл, на які трапяць дзве новыя беларускамоўныя песні (“Калі”, “Дыхаць”) на вершы паэткі Вікторыі Трэнас.

Скачаць кліп можна тут.