Гурэнка: Маё сумленне чыстае, а Чыж лічыў, што я здаў гульню з "Зенітам"

01/02/2019 - 13:12

Былы галоўны трэнер футбольнага мінскага "Дынама" Сяргей Гурэнка даў вялікае інтэрв'ю газеце "Прессбол", у якім распавёў пра сваю працу з камандай, у тым ліку і пра такія скандальныя эпізоды, як разгром ад "Зеніта" (1:8) у кваліфікацыі Лігі Еўропы. Па словах Гурэнкі, ён таксама хоча ведаць, што ж тады адбылося.

"Пасля Піцера было імкненне дакапацца, што ж усё ж такі адбылося, — кажа спецыяліст. — Але зразумеў: калі пачну разбірацца, страчу каманду. І тады "Дынама" дакладна не было б у еўракубках — магу гарантаваць. Што змяніў бы разборкамі?.. Ці сам бы напісаў заяву пра сыход. Як працаваць з людзьмі, якім не давяраю?".

Той разгром у Санкт-Пецярбургу здарыўся пасля бліскучай хатняй перамогі дынамаўцаў над "Зенітам" (4:0). Яе эмацыйна пракаментаваў Аляксандр Лукашэнка. Але ў асноўны час у гасцях лік быў 0:4, дадатковы час быў прайграны з лікам 1:4. Сацсеткі проста выбухнулі падазрэннямі пра здадзены матч.

"Працаваў і чакаў заканчэння чэмпіянату, — распавядае Сяргей Гурэнка. — Таму што толькі пасля яго заканчэння магу шчыра гаварыць на гэтую тэму. Каманда да матчу ў адказ з "Зенітам" была гатовая ідэальна. Душа радавалася, калі бачыў, як хлопцы трэніраваліся".

Паводле слоў трэнера, усялякае можа здарыцца ў матчы, але яго насцярожыла невыкананне часткай футбалістаў устаноўкі, якая адпрацоўвалася. "Не можа за тыдзень каманда так кардынальна змяніцца, — эмацыйна кажа Гурэнка. — ...Мне нецікава, што і як было ў гэтай гульні, хто чым займаўся. Для сябе я ўжо ўсё вырашыў. Я магу сказаць: маё сумленне чыстае. Гатовы прайсці ўсе праверкі, нават публічна, на цэнтральным тэлебачанні. Дэтэктар хлусні, сыроватка праўды, гіпноз — любыя найноўшыя тэхналогіі. Такіх выпадкаў яшчэ не было — чаму б не стаць першым?".

Сяргей Гурэнка кажа, што пасля Санкт-Пецярбурга ён не сустракаўся з уладальнікам каманды Юрыем Чыжом. Паводле чутак, кажа ён, Чыж нібыта лічыць, што гэта Гурэнка здаў той матч. Што да згадкі Гурэнкам на пасляматчавай прэс-канферэнцыі "Газпраму", то доказаў дачынення кампаніі да таго скандалу ён не мае.