Група па Украіне не падпісала дакумент аб адводзе цяжкіх узбраенняў

Рабочая група па бяспецы кантактнай групы па Украіне дасягнула пагаднення аб адводзе ўзбраення калібрам да 100 мм. Пра гэта сёння заявіў журналістам спецыяльны прадстаўнік АБСЕ ў трохбаковай кантактнай групе Марцін Сайдзік, перадае БЕЛТА.

Паводле яго словаў, дасягнутае пагадненне па плане адводу танкаў і некаторых відаў зброі. Яно будзе праходзіць паэтапна, па вызначаным часовым графіку. Таксама на сустрэчы абмяркоўваўся план дээскалацыі канфлікту ў Шырокіна і ваколіцах. Пры гэтым сам дакумент не быў дадпісаны.

Рабочая група па палітычных пытаннях абмяркоўвала правядзенне мясцовых выбараў. Таксама абмяркоўвалася магчымасць арганізаваць дадатковы прапускны пункт у Луганскай вобласці, “бо неабходна аблегчыць жыццё насельніцтва”, адзначыў прадстаўнік АБСЕ.

Апроч таго, бакі абмяркоўвалі аднаўленне водазабеспячэння ў Данецкай і Луганскай абласцях пры дапамозе ўраду Германіі, а таксама аднаўленне чыгуначнай інфраструктуры перавозкі вугалю.