Вы тут

Галоўны рэдактар "Эхо Москвы" анансаваў інтэрв'ю са Святланай Ціханоўскай

Аляксей Венядзіктаў / Еўрарадыё

Галоўны рэдактар расійскай радыёстанцыі "Эхо Москвы" Аляксей Венядзіктаў анансаваў інтэрв'ю са Святланай Ціханоўскай. Але ўдакладніў, што размова "магчыма" адбудзецца.

"У найбліжэйшы час магчымае інтэрв'ю са Святланай Ціханоўскай. Падкіньце пытанняў", — напісаў ён на сваёй старонцы ў фэйсбуку.

Ён таксама падкрэсліў, што інтэрв'ю будзе арыентавана перш за ўсё на расійскую аўдыторыю.

Адразу пасля выбараў Святлана Ціханоўская і яе прадстаўнікі неаднаразова заяўлялі пра гатоўнасць і жаданне выйсці на кантакт з прадстаўнікамі расійскіх уладаў. Але Масква падтрымала Аляксандра Лукашэнку.

У апошні час у медыяполі дзвюх краін сталі гучаць даволі рэзкія выпады ў адрас уладаў або праўладных структур адно аднаго. У прыватнасці, на расійскім тэлеканале НТВ выйшла праграма, прысвечаная сітуацыі ў Беларусі. Адзін з гасцей ток-шоу юрыст і грамадскі дзеяч Віталь Серуканаў заявіў, што "Лукашэнка зараз спрабуе закідаць нейкімі драўлянымі лапцямі інфармацыйныя тэхналогіі, якія не паддаюцца такім метадам". А на канале RTVi выйшла інтэрв'ю Ціны Кандэлакі з галоўным рэдактарам выдавецкага дома "Комсомольская правда" Уладзімірам Сунгоркіным, дзе абмяркоўвалася сітуацыя з затрыманнем журналіста Генадзя Мажэйкі. Гэтае інтэрв'ю так усхвалявала супрацоўніка беларускага тэлеканала СТБ Рыгора Азаронка, што ва ўласцівай яму непатрабавальнай манеры ён назваў удзельнікаў гутаркі "гэтыя паны" і "медыятвары". А яго калега Яўген Пуставой пайшоў яшчэ далей. Ён разважаў пра стаўленне Аляксандра Лукашэнкі да пандэміі каранавіруса і сказаў, што беларускі кіраўнік у адрозненне ад іншых не хаваецца ў бункеры і не карыстаецца ботаксам. У расийскіх СМІ палічылі, што гаворка ідзе пра Уладзіміра Пуціна.

Цяпер становіцца вядома, што медыярэсурс, які мае дачыненне да расійскай транснацыянальнай кампаніі "Газпрам" рыхтуе інтэрв'ю са Святланай Ціханоўскай.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.