Як у Празе з размахам пахавалі ўнука "карусельшчыка" Вацлава Кочкі (фотафакт)

У пятніцу, 12 кастрычніка, у Празе часткова перакрылі вуліцу Vinohradská. Гэты дзень стаў больш чым сумным для знакамітага і багатага клана Кочкаў. У горадзе з размахам правялі ў апошні шлях Яна Кочку-малодшага — унука прадпрымальніка і ўладальніка знакамітага Мацейскага кірмашу з каруселямі Вацлава Кочкі, што праходзіць у Празе вясной. Труну правезлі на коннай павозцы, піша vinegret.cz. Незвычайная жалобная працэсія прайшла па горадзе да Альшанскіх могілак.

Ян Кочка-малодшы загінуў ва ўзросце 28 гадоў. Прычынай стала ДТЗ, якое, мяркуючы па ўсім, ён сам і справакаваў. Аварыя адбылася тыдзень таму на аўтамагістралі D11. Вяртаючыся ўначы пасля баксёрскага паядынку, Ян Кочка выехаў на сваім "Гелендвагене" на сустрэчную паласу і сутыкнуўся з фурай. Ад удару машыны загарэліся. Кіроўцы загінулі на месцы. Напярэдадні пахавання карыстальнікі сацыяльных сетак называлі Яна Кочку "забойцам і наркаманам", але толькі вынікі экспертызы пакажуць ці знаходзіўся Кочка-малодшы на момант аварыі пад уздзеяннем наркотыкаў або алкаголю.

Нягледзячы на неадназначнае стаўленне грамадскасці да пышнага пахавання, працэсію адмяняць не сталі. Падчас развітання яе суправаджала больш чым тысяча чалавек. Гэта сямейная традыцыя клана. Дзесяць гадоў таму вуліцу Vinohradská таксама перакрывалі. Тады хавалі Вацлава Кочку-малодшага, дзядзьку Яна Кочкі. Яго ў рэстаране застрэліў бізнесмен-канкурэнт.