Еўракамісія аштрафавала Facebook за падман пры куплі WhatsApp

 Еўракамісія аштрафавала Facebook за падман пры куплі WhatsApp

18 траўня Еўракамісія аштрафавала амерыканскую сацсетку Facebook на 120 мільёнаў долараў. Нагодай стала ілжывая інфармацыя, якую Facebook даў пры куплі мэсэнджара WhatsApp, перадае Бі-Бі-Сі.

Рэгулятары ЕС напрыканцы 2014 года дазволілі купіць WhatsApp, не пабачыўшы пагрозы для канкурэнцыі ў сектары сацсетак. Як інфармуе Еўракамісія, Facebook, збіраючыся набываць WhatsApp, заявіў, што не зможа стварыць надзейную аўтаматызаваную сістэму, якая дазваляе звязаць акаўнты карыстальнікаў у двух сэрвісах.

Аднак у жніўні 2016-га WhatsApp паведаміла пра абнаўленне ўмоваў выкарыстання сэрвісу і палітыкі прыватнасці. У прыватнасці, туды ўключалася магчымасць звязаць нумары карыстальнікаў WhatsApp з акаўнтамі ў Facebook.

Правёўшы расследаванне, Еўракамісія высветліла, што кампанія падала заведама непраўдзівую інфармацыю: тэхнічная магчымасць спалучыць акаўнты ў Facebook і WhatsApp існавала і ў 2014 годзе.

Дарэчы, у кастрычніку 2016-га Facebook часова спыніў збор звестак карыстальнікаў WhatsApp ў Еўрасаюзе пасля ціску мясцовых уладаў.

Апошнія навіны

Галоўнае

Выбар рэдакцыі