ЕС і СЕ: Заклікаем Беларусь перайсці да адмены пакарання смерцю
"Мы заклікаем Беларусь перайсці да адмены пакарання смерцю", — гаворыцца ў заяве Еўрасаюза і Савета Еўропы. Яны ў чарговы раз заявілі пра непрыманне смяротнага пакарання ва ўсім свеце і пры любых абставінах.
"Смяротнае пакаранне — гэта жорсткае, бесчалавечнае і прыніжальнае для годнасці пакаранне, якое супярэчыць праву на жыццё, — чытаем ў дакуменце. — Яго адмена неабходная дзеля павагі чалавечай годнасці".
Заява з'явілася з нагоды Еўрапейскага і Сусветнага дня барацьбы супраць смяротнага пакарання, які адзначаецца 10 кастрычніка. Беларусь — адзіная краіна ў Еўропе, у якой існуе смяротнае пакаранне. Нядаўна Аляксандр Лукашэнка заявіў, што ў будучыні па пытанні смяротнага пакарання ў нашай краіне можа прайсці рэферэндум.
