Экс-міністра Аляксея Улюкаева асудзілі ў Расіі на 8 гадоў строгага рэжыму

Замаскварэцкі суд Масквы асудзіў былога міністра Расіі Аляксея Улюкаева на восем гадоў калоніі строгага рэжыму. Таксама ён мусіць выплаціць штраф у 130 мільёнаў расійскіх рублёў. Ён не зможа займаць пасады ні ў органах улады, ні ў дзяржкарпарацыях, піша "Новая газета". 

Суддзя Ларыса Сямёнава адзначыла, што ў экс-міністра ёсць змякчальныя абставіны — непаўналетнія дзеці і пажылыя бацькі-інваліды.

"Усім дзякуй. Гэта несправядлівы прысуд. Але я працягваю спадзявацца", — сказаў Улюкаеў з клеткі журналістам.

Раней экс-міністра прызналі вінаватым у атрыманні хабару. Як вырашыў суд, Улюкаеў "выношваў злачынны намер" на атрыманне хабару ад кіраўніка "Раснафты" Ігара Сечына ў абмен на станоўчае заключэнне Мінэканамразвіцця па прыватызацыі "Башнафта".

Журналісты "Новай газеты" звяртаюць увагу, што ў прысудзе суддзя Сямёнава не прывяла паказанні на следстве самога Ігара Сечына, галоўнага сведкі. Не даследаваліся яны і падчас пасяджэнняў. У суд Сечын так і не прыйшоў, нягледзячы на ​​неаднаразовыя позвы.

У аснову абвінаваўчага прысуду леглі санкцыя суда на праслухоўку тэлефонных перамоваў Улюкаева і аўдыёзапіс тэлефанаванняў.

Аляксея Улюкаева затрымалі 15 лістапада 2016 года ў офісе "Раснафты". Экс-міністр не прызнае сваю віну і вінаваціць Сечына ў правакацыі.