"Дзейнічалі дзеля фінансавай выгады": праваднікоў мігрантаў адправілі ў турму
Міграцыйны крызіс, фота ілюстрацыйнае / euroradio.fm
Польскі суд прысудзіў да турэмнага зняволення дзесяць чалавек, якія дапамаглі 225 мігрантам перасекчы беларуска-польскую мяжу ў абыход рэгулярных працэдур. Суд Любліна прысудзіў ім тэрміны ад 1 года і 1 месяца да 2 гадоў і 2 месяцаў пазбаўлення волі.
Паводле звестак пракурора, асуджаныя дапамаглі мігрантам з Афганістана, Ірака, Пакістана і шэрагу іншых краін Азіі і Афрыкі ўехаць у Польшчу ў 2024 і 2025 гадах.
Некаторыя з асуджаных выступалі ў ролі праваднікоў — яны суправаджалі мігрантаў праз участкі мяжы, размешчаныя паміж афіцыйнымі пунктамі пропуску. Іншыя перавозілі мігрантаў на спецыяльна падрыхтаваным транспарце ў выбраныя краіны Еўрапейскага саюза.
Суд пастанавіў, што ўсе асуджаныя рабілі гэта дзеля фінансавай выгады.
