Дзе трымаюць грошы беларускія эканамісты?

Старшыня Нацбанка Надзея Ермакова падчас жывой лініі прызналася Еўрарадыё, што захоўвае грошы на рублёвым дэпазіце, уклад “Пенсійны”. Фішка ўкладу ў тым, што грошы з дэпазіту можна забраць у любы момант.

“У мяне невялікая стаўка, недзе 27%, калі не памыляюся. У мяне ўклад “Пенсійны”,  з якога грошы можна здымаць штодзень.  Я цяпер без жылля — будуюся, таму іншым разам трэба разлічвацца з будаўнікамі. Я сціплы чалавек, таму і на дэпазіце ў мяне невялікая стаўка, каб мяне як старшыню Нацбанка не папракнулі, што я праводжу палітыку высокіх ставак”, — прызнаецца Еўрарадыё Надзея Ермакова.

Прыкладна гэтай жа стратэгіі прытрымліваецца і  фінансавы аналітык афіцыйнага партнёра “Альпары” ў Мінску Вадзім Іосуб. Аналітык прызнаецца, што трымае грошы на зберагальнай картцы.

“Зберагальная картка, з аднаго боку, дае працэнты практычна як па тэрміновых дэпазітах, з другога, дзейнічае як дэпазіт да запатрабавання, што дазваляе зняць грошы ў любы момант. Стаўка даволі высокая (эканаміст не стаў рэкламаваць банк, але прызнаўся, што стаўка ў раёне 31% — заўвага Еўрарадыё). Аптымальны варыянт, які дазваляе спаць спакойна”, — заўважае Вадзім Іосуб.

Дарэчы, на яго думку, з беларускім рублём "прынамсі да прэзідэнціх выбараў нічога не зробіцца”.

Іосуб: “Цяпер выгадней трымаць грошы ў рублёвых дэпазітах. То бок гэта ўсё яшчэ больш, чым прыносяць валютныя дэпазіты з улікам тэмпаў дэвальвацыі. Стаўкі па дэпазітах у валюце — каля 5%».

Яшчэ адзін незалежны эканаміст, Сяргей Чалы, таксама трымае грошы на такой жа зберагальнай картцы.

“Мой банк, праўда, бярэ камісію за зняцце грошай, нават у банкамаце самога банка, але гэта цяпер для мяне самы выгадны прадукт. Да таго ж ці патрэбны гэтыя наяўныя гроша? Працэнтнай стаўкі не ўспомню”, — на думку эканаміста, калі гаворка ідзе пра больш доўгія тэрміны, можна пакласці грошы і да трох месяцаў на дэпазіт у рублях. Калі тэрмін большы, узнікаюць пытанні.

Эканаміст Леанід Злотнікаў папярэджвае, што грошай цяпер не мае, але рэкамендуе захоўваць грошы ў рублях. Гэта больш даходныя ўклады, чым валютныя.

Былы  старшыня Нацбанка Станіслаў Багданкевіч усю сваю пенсію выдаткоўвае на сям'ю. Але ёсць зберажэнні. У валютных дэпазітах! Але тым, хто мае грошы, былы старшыня Нацбанка рэкамендуе трымаць іх у… рублёвых укладах.

“Пакуль інфляцыя, а яна складае, калі не памыляюся, 20%, даходнасць рублёвых дэпазітаў захоўваецца”, — кажа Станіслаў Багданкевіч.