“Дыктатар зажмурыўся ў Крамлі”: беларусы — пра стан Лукашэнкі

09/05/2023 - 20:57

Аляксандр Лукашэнка на парадзе Перамогі ў Маскве / ТАСС

Аляксандр Лукашэнка на парадзе Перамогі ў Маскве / ТАСС

"Ці ёсць у Аб'яднанага пераходнага кабінета план на выпадак таго, калі Лукашэнка адкіне капыты найбліжэйшым часам???" — такое пытанне ў твітары агучыў карыстальнік @naziralnik, але не толькі ён. У чым справа?

Лукашэнка, звычайна даволі бадзёры, на парадзе 9 траўня ў Маскве не здолеў прайсці некалькі соцень метраў і запрасіў аўтамабіль, а потым тэрмінова вылецеў назад у Мінск. Нават не застаўся на абед з калегамі па краінах СНД.

Увечары, на афіцыйных мерапрыемствах з нагоды Дня Перамогі ў Мінску, ён сам усклаў вянок, але ўпершыню не выступіў з прамовай — замест яго гэта зрабіў міністр абароны Віктар Хрэнін. Гэта, плюс дрэнны выгляд палітыка і загадкавы бінт на яго руцэ выклікалі процьму пытанняў і чарговы віток тэорый пра стан яго здароўя. І вось як на гэта адрэагавалі беларусы.

"Значыць, мы даведаліся, што дзеду балюча хадзіць і час ад часу ён капаецца фізрастворам. Добрая навіна: ён пакутуе. Кепская: з гэтым можна жыць”, — піша Вікторыя Пальчыс, жонка палітвязня Эдуарда Пальчыса.

Такіх меркаванняў нямала. “Перажыве нас усіх", — піша з інтанацыяй, якую няцяжка ўгадаць, карыстальнік @leon_walras18.

Але сур’ёзных абмеркаванняў здароўя Лукашэнкі не так і многа: спецыялістаў па пастаноўцы дыягназаў на падставе некалькіх фотаздымкаў і пары відэа ў Беларусі няшмат. Затое шмат тых, хто ўяўяе магчымыя варыянты развіцця падзей:

"Чакаю загалоўка на Хартыі: "Диктатор зажмурился в Кремле!!!" — напісаў @tavarysh_b.

Антон Матолька падышоў да пытання больш грунтоўна, чым абмеркаванне магчымых загалоўкаў:

"Качанава, ты гатовая ўзяць кіраўніцтва Саветам Бяспекі на сябе ці не?" — запытаўся блогер, але публічнага адказу пакуль не атрымаў.

Фігуру спікеркі Савета Рэспублікі Наталлі Качанавай, якая паводле Канстытуцыі ў выпадку выбывання Лукашэнкі аўтаматычна зойме яго пасаду, згадвае шмат хто: нехта жартуе, што ёй можа быць выгадны яго стан, іншыя — што "Качанава — наш прэзідэнт".

Дарэчы, пра Качанаву. Красамоўна на допіс Матолькі пра яе адказаў карыстальнік @gypsynkov: "Вальфовіч [сакратар Саўбеза] і Віктар [Лукашэнка] такія” і дадаў мем з Колінам Фарэлам, які звычайна называюць “ну так, ну так, пайшоў я нах…”

Вольфович и Виктор такие: pic.twitter.com/Z4ANcxLAyH
— Спадар Джыпсінкоў (@gypsynkov) May 9, 2023

Нечаканы плюс знайшоў Іван Шыла: “Калі Лукашэнка памрэ сёння [допіс ад 9 траўня], беларусы будуць асуджаныя святкаваць 9 траўня да канца стагоддзяў. І гэта было б выдатна!” Але, падаецца, гэты сцэнар пакуль не спраўджваецца.

Што праўда, у бальшыні настрой хутчэй скептычны. "Ды адляжыцца два дні і такі разнос усім зладзіць, што толькі пёры ляцець будуць. Два пералёты за дзень і маладым не заўсёды лёгка даюцца", — напісаў @Veterrr.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.