Вы тут

Два беларускія мультфільмы трапілі на круты кінафестываль. Пра што яны?

"Паданне пра гуслі" / kimpress.by

Беларускія мультфільмы "Лагодны воўк" і "Паданне пра гуслі" трапілі ў конкурс фестывалю анімацыйнага кіно ў Хірасіме. Арганізатары выбралі гэтыя мульцікі з больш чым 2300 заявак з 84 краін. А ўсяго ў конкурсе 59 работ.

Фестываль у Хірасіме — найбуйнейшы форум анімацыйнага кіно ў свеце. Нават проста ўдзельнічаць у ім лічыцца прэстыжным.

Пра што гэтыя беларускія мультфільмы і хто іх зняў?

Стужка "Лагодны воўк" выйшла ў 2018 годзе на студыі "Беларусьфільм". Наталля Дарвіна-Хаткевіч зняла яе па казцы беларускай пісьменніцы Алены Масла. Гэта гісторыя галоднага ваўка-вегетарыянца з добрым сэрцам. Ён сілкуецца выключна травой, мёдам і гарбатай, але аднойчы зімовы голад становіцца настолькі невыносным, што воўк вырашае ўкрасці барана... Як гэта і прынята ў казках, перамагаюць дабро і сяброўства.

"Лагодны воўк" / belta.by

— Сучаснаму свету вельмі патрэбна дабрыня, — так каментуе сваю работу рэжысёр. — Ён задыхаецца ад гневу. Павінна быць такое кіно, пасля якога ты хочаш стаць лепшым, ты хочаш жыць.

Мультфільм "Паданне пра гуслі" рэжысёра Таццяны Кубліцкай — фантастычная гісторыя, як не складана здагадацца, пра гуслі. Хлопчык іх майструе з шчыта і цецівы лука. Усё для таго, каб скончыць вайну і вярнуць дадому бацьку. Пад чароўную музыку ваяры ўспамінаюць родных, пераадольваюць варожасць адзін да аднаго і мірацца.

18-ы Міжнародны фестываль анімацыйных фільмаў у Хірасіме пройдзе з 20 да 24 жніўня. Праз пандэмію фармат форуму абмежавалі: фільмы-пераможцы арганізатары будуць трансляваць анлайн.

 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.