Для таксістаў і кур'ераў у Мінску адмянілі абавязковую прышчэпку ад COVID-19
Патрабаванне да кіроўцаў мінскіх таксі вакцынавацца пратрымалася тыдзень / kurjer.info
Таксісты і кур'еры ў Мінску больш не абавязаныя рабіць прышчэпку ад COVID-19 і прад'яўляць сертыфікат аб вакцынацыі па патрабаванні. Пра гэтае патрабаванне стала вядома напярэдадні, а ў пятніцу яго ўжо адмянілі.
Аб адмене "Змяненняў у комплексны план санітарна-эпідэміялагічных мерапрыемстваў, накіраваных на прадухіленне ўзнікнення і распаўсюджвання інфекцыі COVID-19 у горадзе Мінску" паведаміў Telegram-канал "Мінск. Афіцыйна".
Змены, прынятыя 14 кастрычніка, прадугледжвалі, што ўсе кур'еры і кіроўцы таксі ў Мінску павінныя быць вакцынаваныя ад каранавіруса. Прычым прышчэпку яны мусілі зрабіць да 1 лістапада і па патрабаванні паказваць дакумент аб вакцынацыі.
Днямі Аляксандр Лукашэнка раскрытыкаваў рашэнне ўрада і мясцовых уладаў увесці масачны рэжым і ўзмацніць адказнасць за яго парушэнне. Ён таксама выказаўся супраць прымусовай, па яго адчуваннях, вакцынацыі грамадзян. "Я не магу забараняць вакцынаваць людзей, але і напружваць вы людзей не будзеце", — казаў чыноўнікам Лукашэнка.
Між тым у Беларусі захоўваецца вельмі напружаная сітуацыя з захворвальнасцю на каранавірус.
