Цыбуля, лімон і базілік: якую зеляніну можна вырасціць у кватэры?
![У кватэры могуць расці нават памідоркі!](/sites/default/files/styles/gallery_main/public/2023-10/img_20200617_140215.jpg.webp?itok=6OT-jMS4)
У кватэры могуць расці нават памідоркі! / Еўрарадыё
У цёмны час года, а менавіта позняй восенню і зімой, нам не хапае зеляніны не толькі навокал, але і ў ежы. Для ўзняцця настрою і для з’яўлення хоць якіх натуральных вітамінаў і мінералаў у рацыёне беларуска Марыя прапаноўвае стварыць агарод дома на падаконні. І дзеліцца сваім досведам: якая зеляніна лепш і хутчэй расце ва ўмовах кватэры.
Цыбуля
Бяспройгрышны варыянт для пачаткоўцаў!
— Я пачынала з цыбулі, бо прасцей ужо няма куды. Абрэзаць верхавіну і паставіць у ваду на падаконні. Працуе і летам, і зімой. Хутка, проста і надае ўпэўненасці ў тым, што ты можаш нешта вырасціць. Можна ўзяць часнок і зрабіць тое самае, — кажа Марыя.
Базілік
У свежым і сушаным выглядзе — выдатная прыправа для салатаў, піцы і пасты. Яго можна вырасціць з насення — кінуць зярняткі ў грунт і паставіць на сонечны бок. Каб хутчэй прараслі, можна накрыць гаршчок плёнкай. Галоўнае, на забываць паліваць і набрацца крыху цярпення. А можна купіць у краме свежы базілік у гаршчэчку і паспрабаваць яго акуратна перасадзіць у грунт дома.
Ліставы салат
Пасуе любы. Салаты хутка вырастаюць з насення і не патрабуюць асабліва складанага догляду. Усё, што ім патрэбна, — вада і святло. Мінус у тым, што ўсё, што вырасла, можна састрыгчы за адзін раз, таму мае сэнс пасадзіць дзве партыі з розніцай у тыдзень. Пакуль адзін будзе абнаўляцца, другі можна зрэзаць.
![Цыбуля, лімон і базілік: якую зеляніну можна вырасціць у кватэры?](/sites/default/files/styles/default_image_paragraph/public/paragraphs/image/photo_2020-07-06_18-59-47.jpg.webp?itok=N5T_k5UJ)
Памідоры
Позняй восенню іх садзіць ужо запозна, але можна паспрабаваць забяспечыць іх дадатковым асвятленнем. Існуюць нават асобныя гатункі пакаёвых памідорак. Яны і выглядаюць прыгожа, і ўраджай можна збіраць ледзь не цэлы год.
Суніцы
Тут таксама трэба набрацца цярплівасці. Кусты вырастуць, але каб яны далі кветкі, а потым і ягады, трэба пачакаць. Што важна: лепей выбраць рэмантантны гатунак, гэта значыць, які дае плады пастаянна, і забяспечыць кустам дастаткова вільгаці і святла.
Батат
Не самы відавочны варыянт, але чаму не! Салодкая бульба наўрад ці дасць плады дома, але дзіўная расліна можа ўпрыгожыць вашае жытло.
— Батат трэба паставіць у ваду: ён або пусціць карэнне і пачне плесціся, або пойдзе цвіллю і згніе. Ад чаго гэта залежыць, я так і не зразумела, бо ў аднолькавых умовах атрымлівала розныя вынікі. Але ўрэшце ў мяне вымахаў батат, які рос са снежня да лютага на не самым асветленым падаконні, — дзеліцца досведам Марыя.
Перац чылі
![Цыбуля, лімон і базілік: якую зеляніну можна вырасціць у кватэры?](/sites/default/files/styles/default_image_paragraph/public/paragraphs/image/IMG_20200729_200521.jpg.webp?itok=qJ1maPSD)
Авакада
Калі вам у краме або на рынку трапіўся авакада з масіўнай косткай, не выкідайце яе. Пастаўце костку тупым канцом у ваду — і чакайце, пакуль яна трэсне і дасць карэньчык. Чакаць можна доўга, што праўда. Але затое потым расліна як папрэ ў рост! Высаджваць у грунт трэба, калі белы карэньчык ужо пакажацца на 3-7 см.
Лімон
Хто ў дзяцінстве не тыркаў косткі з лімонаў і апельсінаў у матуліны вазоны, можа гэтым заняцца цяпер. Толькі ўжо па-даросламу: высаджвайце костачкі ў асобны гаршчок і чакайце, калі яны прарастуць.
![Цыбуля, лімон і базілік: якую зеляніну можна вырасціць у кватэры?](/sites/default/files/styles/default_image_paragraph/public/paragraphs/image/IMG_20200505_191108.jpg.webp?itok=Cd8fwac8)
Кветкі
Настурцыі і фіялкі не толькі дадаюць колераў — іх нават ужываюць у ежу.
— Калі хочаце, каб нешта плялося і цвіло, асабліва на балконе, настурцыі — выдатны варыянт. Хутка, прыгожа, але трэба загадзя прыкінуць, куды яны будуць плесціся, — раіць Марыя, што ўжо выгадавала дома цэлы агарод.
Фіялкі з насення растуць марудна, таму лепей выбіраць гатунак, які цвіце ў першы ж год, бо іначай пабачыце кветкі толькі ў наступным сезоне.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.