Чырвоны Крыж просіць Мінздароўя абавязаць медработнікаў плаціць унёскі
![Беларускі Чырвоны Крыж](/sites/default/files/styles/gallery_main/public/2024-01/krynz-1201.jpg.webp?itok=kDKk2-_M)
Беларускі Чырвоны Крыж / t.me/redcrossby
Беларускае таварыства Чырвонага Крыжа (БТЧК) пасля страты фінансавання ад міжнародных праграм шукае сродкі да існавання ў кішэнях медработнікаў. У прыватнасці мінскае аддзяленне таварыства звярнулася ў Міністэрства аховы здароўя з просьбай "аказаць садзейнічанне ў пераходзе на фіксаванае членства ў першасных арганізацыях Беларускага Чырвонага Крыжа ўстаноў аховы здароўя горада Мінска". Для гэтага трэба, каб патэнцыйныя члены напісалі заяву на адлічэнне ўзносаў "у памеры 1% сярэднямесячнай заработнай платы раз у год". Дакумент-зварот публікуе ў сацсетках Фонд медыцынскай салідарнасці.
Нагадаем, што ў снежні мінулага года Міжнародная Федэрацыя Таварыстваў Чырвонага Крыжа і Чырвонага Паўмесяца (МФТЧКіЧП) прыпыніла членства БТЧК. Прычынай стала адмова з боку Беларусі звольніць старшыню Беларускага Чырвонага Крыжа Дзмітрыя Шаўцова. Пытанні да яго ўзніклі з-за яго заяў, "у тым ліку аб ядзернай зброі і аб перамяшчэнні дзяцей у Беларусь", а таксама з-за яго візітаў у акупаваныя Расіяй Луганск і Данецк, гаварылася ў прэс-рэлізе міжнароднай арганізацыі.
Нагадаем, Шаўцоў падчас візітаў у акупаваныя раёны Украіны насіў адзенне з літарай Z. Ён таксама заяўляў, што Беларускі Чырвоны Крыж удзельнічае ў вывазе ўкраінскіх дзяцей у Беларусь.
![Красный Крест просит Минздрав обязать медработников платить взносы в организацию](/sites/default/files/styles/default_image_paragraph/public/paragraphs/image/med_19_02.jpg.webp?itok=rZJfs3fx)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.