Большасць тых, хто ў 2020-м пратэставаў, не плануе эміграваць з Беларусі

Пратэст у Беларусі ўзімку 2020-га / Еўрарадыё, архіўнае фота

Большасць беларусаў, якія ў 2020 годзе падтрымалі пратэсты, не плануюць у бліжэйшы год эміграваць з краіны. Такія вынікі паказала апытанне, праведзенае Цэнтрам новых ідэй.

У апытанні паўдзельнічалі больш за 1600 чалавек. Палова з іх жыве ў Мінску, 76% маюць вышэйшую адукацыю, амаль усе ўдзельнікі пазітыўна ставяцца да пратэсту 2020 года.

Як расказаў дырэктар Цэнтра новых ідэй Антон Раднянкоў, 56% рэспандэнтаў не плануюць з'язджаць з Беларусі ў бліжэйшы год. Траціна апытаных задумваецца пра гэта, але яшчэ не вырашыла, 11% ужо адважыліся на пераезд. З'язджаць плануюць пераважна мінчукі і жыхары абласных цэнтраў.

Асноўных прычынаў заставацца ў Беларусі называюць тры:
— неразуменне, навошта з'язджаць з роднай краіны; 
— неабходнасць дапамагаць сваякам; 
— страх не знайсці годную працу за мяжой.

Для пераезду ў іншую краіну тры асноўныя прычыны гучаць так: 
— палітычныя рэпрэсіі;
— адсутнасць перспектыў у Беларусі; 
— асцярога, што Беларусь уступіць у вайну супраць Украіны.

Толькі траціна рэспандэнтаў верыць, што на радзіму вернецца большасць тых, хто з'ехаў.

Дарэчы, 38% рэспандэнтаў заявілі, што гатовыя з'ехаць з краіны, калі беларускія і ўкраінскія войскі пачнуць змагацца на тэрыторыі Беларусі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.