У сакавіку ў Беларусі 211 тысяч чалавек знаходзіліся ў адпачынку за свой кошт ці працавалі няпоўны працоўны дзень. У студзені гэтая лічба была роўная 175 тысячам чалавек. Прычым з гэтых 211 тысяч амаль 96 тысяч знаходзіліся ў прастоі і атрымлівалі толькі 2/3 заробку. Гэта на 23 тысячы чалавек больш, чым у студзені 2015 года (гл. табліцу).

Што рабіць, калі адпраўляюць у адпачынак за свой кошт

Такія дадзеныя дае беларуская статыстыка. Пералічыць Еўрарадыё прадпрыемствы, якія прастойвалі ў сакавіку, Белстат не можа, бо гэта камерцыйная таямніца, але кажуць, што асноўнае, дзе людзям няма ні працы, ні заробку, — гэта прадпрыемствы прамысловасці.

“У асноўным прамысловасць стаіць. Вы ж самі разумееце, якая цяпер сітуацыя ў эканоміцы. Вы гляньце статыстыку па складскіх запасах. Дык навошта вырабляць прадукцыю на склад? Вось прадпрыемства і стаіць”, — тлумачаць у Белстаце.

“Вось так наўпрост прадпрыемствы не заяўляюць, што стаяць, гэта не. Але плаваючыя праблемы ёсць на БеЛАЗе”, “Амкадоры”, МАЗ у пятніцу не працуе. Людзі не ведаюць, ці будзе праца на наступным тыдні, — кажа Еўрарадыё лідар прафсаюза радыёэлектроннай прамысловасці (РЭП) Генадзь Фядыніч. — Да прыкладу, вялікія праблемы цяпер на “Гомсельмашы” — яны прыйшлі да таго, што вырабляць трэба столькі, колькі прадаецца. І гэта правільна. Але там збіраюцца скараціць каля 50% працаўнікоў. Гэта адбудзецца паступова — звольняць пенсіянераў, яшчэ каго, і паступова яны дасягнуць гэтай лічбы”.

Маладую спецыялістку перавялі на трохдзёнку пад пагрозай звальнення

На думку Генадзя Фядыніча, лічба ў 211 тысяч непрацуючых беларусаў летам лёгка можа ператварыцца ў 300 тысяч.

“Нехта ідзе на 2/3 заробку, некаторыя добраахвотна-прымусова ўвогуле без заробку застаюцца. Бліжэй да лета гэтая лічба, безумоўна, павысіцца — да 300 тысяч чалавек”.

Табліца. Вымушаная няпоўная занятасць і паўнадзённыя прастоі