Больш за 20 афіцэраў Дэпартамента фінансавых расследаванняў трапілі за краты

Больш за 20 старшых афіцэраў Дэпартамента фінансавых расследаванняў Камітэта дзяржаўнага кантролю РБ трапілі за краты. Арышты праводзіць КДБ. Асноўны ўдар прыйшоўся на ўпраўленне па Мінскай вобласці і Мінску, а таксама на цэнтральны апарат, піша "Наша ніва" са спасылкай на свае крыніцы.

Арышты праходзяць ужо некалькі тыдняў у рамках расследаванняў спраў, распачатых па фактах атрымання хабараў і "перавышэння службовых паўнамоцтваў". Спачатку быў затрыманы з хабарам, атрыманым ад прадпрымальніка, афіцэр з мінскага ўпраўлення. Ён і пачаў расказваць пра іншых.

ДФР удзельнічае ў рэпрэсіях, выконваючы замовы па ліквідацыі бізнесаў, пасадках няўгодных ці выцісканні іх за мяжу праз фабрыкацыю эканамічных крымінальных спраў. Летам 2023-га ў Дэпартаменце заявілі, што за паўгода выяўлена 75 злачынстваў па "фінансаванні тэрарыстычнай і экстрэмісцкай дзейнасці". Найперш маюцца на ўвазе данаты на дапамогу фондам падтрымкі рэпрэсаваных беларусаў.

Нядаўна Дэпартамент фінансавых расследаванняў узначаліў выхадзец з КДБ — палкоўнік Андрэй Самбук, які ўзначальваў Следчае ўпраўленне.