“Белая Русь” абяцае сабраць 100 тысяч подпісаў за Лукашэнку за пяць дзён

Рэспубліканскае грамадскае аб’яднанне “Белая Русь” мае намер за пяць дзён сабраць сто тысяч подпісаў за вылучэнне кандыдатам у прэзідэнты Аляксандра Лукашэнку. Пра гэта заявіў старшыня арганізацыі Аляксандр Радзькоў, выступаючы 11 ліпеня ў Мінску на пашыраным паседжанні рэспубліканскага савету аб’яднання.
 
Каб рэалізаваць гэтую ідэю, трэба выкарыстоўваць усе наяўныя магчымасці — збіраць подпісы на пікетах і хадзіць па кватэрах. Радзькоў падкрэсліў, што “Белая Русь” здольная справіцца з такой задачай, бо колькасць актывістаў самой арганізацыі складае болей за 155 тысяч чалавек.

Таксама Радзькоў адзначыў: неабходна пераканаць выбаршчыкаў, што менавіта Лукашэнка з’яўляецца “нацыянальным лідарам”.

Прэзідэнцкія выбары адбудуцца ў Беларусі 11 кастрычніка, паведамляе БелаПАН.

Фота: БЕЛТА