"Белавія" і авіяўлады Беларусі трапяць пад санкцыі ЕС
Еўрасаюз рыхтуе санкцыі супраць кампаніі "Белавія" і прыкладна дзясятка прадстаўнікоў авіяцыйных уладаў Беларусі, паведамляе Reuters.
Агенцтва сцвярджае, што ўжо ў бліжэйшую пятніцу краіны ЕС могуць папярэдне ўхваліць забарону для беларускай авіякампаніі на палёты і пасадку на тэрыторыі ЕС.
У “чорны спіс” могуць таксама трапіць і чыноўнікі з Мінабароны і Мінтранса, хтосьці з кіраўніцтва Нацыянальнага аэрапорта Мінск.
У нядзелю, 23 траўня ўлады Беларусі прымусова пасадзілі ў Мінску самалёт кампаніі Ryanair, які ляцеў з Афінаў у Вільню. З борта самалёта былі знятыя блогер і журналіст Раман Пратасевіч і яго дзяўчына Сафія Сапега. Пасля гэтага захопу самалёта краіны ЕС сталі адмаўляцца ад выкарыстання паветранай прасторы Беларусі і закрываць сваё неба для беларускіх авіяперавозчыкаў.
