Беларускія ваяры вырашылі стварыць ЧВК
Беларускія добраахвотнікі ва Украіне / facebook.com/belwarriors/
Беларускія ваяры вырашылі стварыць Часовую вайсковую камісію. Пра гэта было аб'яўлена на канферэнцыі "Шлях да волі" ў Кіеве. На чале ЧВК стаў ваяр Палка Каліноўскага Павел Шурмей ("Дзядзька"), паведамляе "Белсат".
У дэкларацыі, прынятай на канферэнцыі, адзначаецца, што ЧВК — "калегіяльны выканаўчы орган, які фармуецца шляхам роўнага прадстаўніцтва беларускіх нацыянальных вайсковых фармаванняў і парамілітарных арганізацый". Яе мэтай называецца фармаванне вайсковай грамадска-палітычнай арганізацыі "Беларуская Вызвольная Армія". Яно "ажыццяўляецца шляхам згуртавання і арганізацыі вайскоўцаў як на тэрыторыі Беларусі, так і па-за яе межамі, якія захавалі вернасць прысязе народу Беларусі, а таксама цывільных удзельнікаў нацыянальных вайсковых і парамілітарных фармаванняў і грамадскіх аб'яднанняў".
У дэкларацыі падкрэсліваецца, што "БВА ствараецца для вызвалення Беларусі і аднаўлення Канстытуцыйнага ладу". З моманту перадачы паўнамоцтваў кіраўніцтву БВА Часовая вайсковая камісія спыніць сваю дзейнасць.
