Беларускія мытнікі перахапілі 38 кг гашышу

Буйную партыю наркотыкаў перахапілі беларускія мытнікі на мяжы з Літвой — 38 кг гашышу, паведамляе прэс-служба ведамства.

Літоўскі перавозчык вёз у Беларусь два легкавыя аўтамабілі — BMW X5 2023 года выпуску і Opel Insignia 2019 года выпуску.

У пункце пропуску "Беняконі" грузавік з машынамі накіравалі на праверку з дапамогай сканера. Там і выявіўся незаяўлены груз у адным з бакаў. У выніку з "Опеля" дасталі 29 брыкетаў са спрасаваным рэчывам цёмна-карычневага колеру. Экспертыза пацвердзіла, што гэта гашыш.

За кантрабанду наркотыкаў праз мяжу пачалі крымінальную справу.