Беларуская чыгунка не плануе аднаўляць рух пасажырскіх цягнікоў у Польшчу

Беларуская чыгунка не плануе аднаўляць рух пасажырскіх цягнікоў праз беларуска-польскую мяжу. Пра гэта ў кантакт-цэнтры БЧ паведамілі журналістцы "Белсата".

"На дадзены момант у кантакт-цэнтр Беларускай чыгункі інфармацыі аб прызначэнні цягнікоў у злучэнні з Польшчай не паступала", — прыводзіць "Белсат" адказ беларускай чыгункі.

У кантакт-цэнтры БЧ рэкамендавалі адсочваць актуальную інфармацыю на афіцыйным сайце pass.rw.by, у мабільнай праграме "БЧ. Мой поезд" ці звяртацца ў кантакт-цэнтр Беларускай чыгункі на нумар 105. Пасажыры, якія знаходзяцца за межамі Беларусі, могуць зрабіць гэта праз тэлефон (+375 222) 39 25 47.

Пасажырскі чыгуначны рух паміж Польшчай і Беларуссю спыніўся ў сакавіку 2020 года. Спачатку на гэта паўплывала пандэмія каранавіруса, а потым — санкцыі супраць рэжыму Лукашэнкі. Цяпер прадстаўнікі польскага кіраўніцтва адной з галоўных перашкод для аднаўлення пасажырскага руху праз мяжу называюць пагрозу нелегальнай міграцыі.

Тым не менш у беларускіх афіцыйных СМІ перыядычна з'яўляюцца звесткі пра нейкія перамовы і нават называюцца даты, калі пасажырскі рух праз мяжу будзе адноўлены. Польскі бок абвяргаў гэтыя заявы.