Беларускага праваабаронцу Бандарэнку будуць судзіць за хуліганства
Дырэктар праваабарончай арганізацыі "Платформ інавейшн" Андрэй Бандарэнка паўстане перад судом па абвінавачванні ў хуліганстве ў Мінску.
Яго справу расследаваў Кастрычніцкі райаддзел Следчага камітэта. Цяпер следства скончанае. Як адзначае interfax.by, сам Бандарэнка і яго адвакат могуць пачаць знаёмства з матэрыяламі справы. Па заканчэнні гэтай працэдуры крымінальную справу перададуць пракурору для накіравання ў суд.
Следства вінаваціць кіраўніка праваабарончай арганізацыі ў хуліганскіх дзеяннях, спалучаных з прымяненнем фізічнай сілы. Гаворка ідзе пра тры эпізоды, прычым у двух выпадках сіла ўжывалася супраць жанчын. Па словах следчых, супрацьпраўныя дзеянні Бандарэнкі пацвярджаюцца сведчаннямі відавочцаў, вынікамі экспертыз, відэаматэрыяламі, іншымі доказамі, сабранымі падчас следства.
Сам Бандарэнка знаходзіцца пад вартай.
Фота — svaboda.org
