Беларус, які атрымаў позву ў Чалябінску, не з'явіўся ў ваенкамат

Позва, якую атрымаў Аляксандр Арлукевіч / t.me/pchikov
Позва, якую атрымаў Аляксандр Арлукевіч / t.me/pchikov

Беларус, якому ўручылі мабілізацыйную позву на заводзе ў Чалябінску, не пайшоў у ваенкамат. Аляксандр Арлукевіч абскарджвае ў судзе рашэнне аб мабілізацыі. Пра гэта ў сваім тэлеграм-канале расказаў расійскі праваабаронца Павел Чыкаў.

Як распавядала Еўрарадыё, Арлукевіч — грамадзянін Беларусі. У Чалябінску ён працуе на цукровым заводзе, але ў Расіі не мае нават віду на жыхарства (расійскае заканадаўства дазваляе гэта беларусам). Яму на працоўным месцы брыгадзір уручыў позву ў ваенкамат. Пры гэтым у позве было пазначана, што Арлукевіч з'яўляецца грамадзянінам Беларусі і што яна датычыць мабілізацыі.

"Аляксандр не з'явіўся па позве 1 снежня. Ваенкамат паведаміў, што мае намер гвалтоўна адправіць яго ў войскі. Арлукевіч, са свайго боку, рыхтуецца абскардзіць пастанову аб мабілізацыі ў судзе", — піша Чыкаў.

Праваабаронца нагадвае, што мабілізацыя закранае толькі грамадзян Расіі. Замежнікі маюць права добраахвотна заключыць кантракт аб праходжанні ваеннай службы.

Для Арлукевіча нанялі адваката.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі