Беларус Дзмітрый Саўян не змог выйграць адбор на "Еўрабачанне" ад Польшчы
Дзмітрый Саўян / muzyka.interia.pl
Беларус Дзмітрый Саўян не змог выйграць адбор на "Еўрабачанне" ад Польшчы. Нягледзячы на станоўчыя водгукі слухачоў і крытыкаў, вынікі закрытага конкурсу аказаліся не на яго карысць. Польшчу на міжнародным песенным конкурсе прадставіць спявачка Luna.
38-гадовы Саўян хацеў паўдзельнічаць у "Еўрабачанні" з песняй "W Kolorku Amaretto". Беларус выступае як акцёр і комік, вядзе свой папулярны TikTok, у якім вядомы як Pan Savyan. З такім псеўданімам ён і ўдзельнічаў у польскім нацыянальным адборы.
Нядаўна спявак прадставіў другі сінгл — "Горад кахання". Гэта іранічная балада да Дня святога Валянціна.
