"Банк Дабрабыт" запусціў плацяжы ў тэнге, сомах, драмах і самоні

"Банк Дабрабыт" запусціў плацяжы ў валютах краін Цэнтральнай Азіі і Закаўказзя. Без дадатковай канвертацыі можна будзе перавесці сродкі ў Казахстан, Кыргызстан, Арменію і Таджыкістан.

"Цяпер прадпрымальнікі і кампаніі могуць наўпрост плаціць замежным контрагентам у іх нацыянальнай валюце, роўна як і атрымліваць ад іх выручку", — гаворыцца ў паведамленні, размешчаным на сайце банка.

Прамыя плацяжы ў казахстанскіх тэнге, армянскіх драмах, кіргізскіх сомах і таджыкскіх самоні даступныя беларускім ІП і юрыдычным асобам.

У банку адзначаюць, што ў кліентаў ёсць некалькі спосабаў перавесці грошы — наўпрост, папярэдне купіўшы валюту ў "Банку Дабрабыт", ці з канверсіяй або купляй валюты. У залежнасці ад гэтага трэба будзе вызначыцца, які рахунак адкрываць — валютны або ў беларускіх рублях. У банку гатовыя пракансультаваць па ўсіх пытаннях.

Камісія за перавод у тэнге, сомах, драмах і самоні складзе 5 даляраў ЗША.

Нагадаем, пераводы з Беларусі і Расіі ў іншыя краіны ў еўра і далярах зрабіліся праблематычнымі на фоне ўвядзення заходніх санкцый.