Арт-шоў у стакгольскім метро, паказ мод у берлінскім і бруд у парыжскім

06/09/2013 - 12:17

На гэтым тыдні кіраўнік парыжскага метро П’ер Монгін заявіў, што прыйшоў час прыбрацца, бо часцей за ўсё пасажыры скардзяцца менавіта на брудныя, засыпаныя смеццем станцыі, лесвіцы, што смярдзяць, спёку і вільготныя платформы. Таму прыборка плануецца капітальная, і каштаваць яна будзе 350 мільёнаў еўра (цягам пяці гадоў). Цікава, што кожны год метро губляе 100 мільёнаў еўра з-за нядобрасумленных пасажыраў, таму кантроль за імі будзе ўзмоцнены, кажа П’ер Монгін:

“Мы караем "зайцаў" вельмі сціпла. Таму я буду прасіць дзяржаву павялічыць штрафы як стрымліваючы фактар гэты правапарушэнняў, асабліва для рэцыдывістаў”.

На дадзены момант штраф складае ад 30 да 60 еўра.

Навесці парадак хочуць і ў варшаўскім метро. Але праз любоў да чысціні тут нядаўна сталі ахвярамі па-буйному.

“Махляры выдалі сябе за клінінгавую кампанію, і паведамілі фальшывы нумар рахунка. І такім чынам выцягнулі з метро амаль 600 тысяч злотых (каля 180 тысяч долараў. — заўв.Еўрарадыё”).

Цяпер справай займаецца пракуратура.

Перформанс "чалавека-павука" у варшаўскім метро

Тым часам у Швецыі журналісты захапляюцца мясцовым метро. На старонцы The Local з’явіўся артыкул “Метро Стакгольма можа пахваліцца падземным арт-шоў”. На 100 станцыях прадстаўлены працы прыкладна 150 мастакоў. Кошт усяго гэтага мастацтва складае каля 1,6 мільёнаў долараў. Што праўда, не ўсе мясцовыя яго ацэньваюць, хаваючыся ў смартфоны і газеты. Затое прыезджыя адразу ж заўважаюць прыгажосць.

The Local: “Метро Стакгольма з’яўляецца магнітам для турыстаў, і часам, зорак — як для амерыканскай поп-дзівы Мадонны, якая выкарыстала станцыі Hötorget и Т-Centralen падчас здымак кліпа ў 1998 годзе”.

Станцыя метро Solna Centrum у Стакгольме

Прызвычаіць пасажыраў да высокага спрабуюць і ў берлінскім метро. Ужо сем гадоў тут у межах летняга тыдня моды ў Берліне адбываецца паказ мод у метро. Падзея заўсёды прыцягвае ўвагу. Але, як піша польскі сайт Deser.pl, не ўсім берлінцам падабаюцца рэзкія вобразы і касцюмы. Магчыма, таму што такое прывыклі бачыць на подыумах па тэлебачанні, а не пад зямлёй, у метро.