Анджэй Дуда: "Рэферэндум, арганізаваны Расіяй, нічога не варты"

Заходнія палітыкі і кіраўнікі дзяржаваў выказваюцца супраць рэферэндумаў, якія плануецца правесці на ўсходзе Украіны.

Канцлер Германіі Олаф Шольц заявіў, што краіна не прызнае іх вынікі, перадае Бі-Бі-Сі.

Прэзідэнт Польшчы Анджэй Дуда сказаў: "Рэферэндум, арганізаваны Расіяй, нічога не варты".

Спікер Белага дома падкрэсліў: "Рэферэндумы, якія арганізуе Расія, з'яўляюцца абразай прынцыпаў суверэнітэту і тэрытарыяльнай цэласнасці".

Гэткую ж думку выказала прэм'ер-міністр Эстоніі Кая Калас: "Так як Расія прасоўвае фэйкавыя рэферэндумы на акупаваных тэрыторыях Украіны, дазвольце мне сказаць гэта гучна і ясна: мы ніколі гэтага не прызнаем".

Як распавядала Еўрарадыё, сёння стала вядома, што на акупаваных тэрыторыях Херсонскай і Запарожскай абласцей, а таксама ў так званых "ЛНР" і "ДНР" пройдуць рэферэндумы па далучэнні да Расіі. Арганізаваць іх плануецца з 23 па 27 верасня.

Украінскія ўлады заклікаюць жыхароў не ўдзельнічаць у незаконным галасаванні. Удзел у рэферэндуме можа разглядацца як акт калабарацыі з акупантамі.