Амбасада Германіі даслала навагоднія лісты 35 палітвязням
Амбасада Германіі напярэдадні Калядаў і Новага года даслала лісты 35 палітзняволеным па ўсёй краіне. Пра гэты дыпламатычная ўстанова паведаміла ў сацсетках.
"Пасольства з болем усведамляе, што ў сямейныя святы Калядаў і Новага года ў шматлікіх беларускіх сем´ях і колах сяброў за сталамі застанецца пустое месца — месца члена сям’і ці сябра, затрыманага па палітычных прычынах. Як пасольства мы таксама і асабліва ў гэтыя дні думаем аб больш за 900 асобах, затрыманых у Беларусі па палітычных прычынах, аб іх сем’ях і сябрах", — кажуць нямецкія дыпламаты.
Яны спадзяюцца, што лісты дойдуць да 35 палітвязняў і падораць ім "трохі сіл і надзеі".
У амбасадзе запэўніваюць, што ў гэтыя святочныя дні пра беларускіх палітвязняў памятаюць і думаюць у Германіі: "Федэральны ўрад Германіі патрабуе неадкладнага і безагаворачнага вызвалення ўсіх палітзняволеных у Беларусі".
Праваабаронцы прызналі палітвязнямі больш за 900 чалавек, а колькасць палітычна матываваных спраў лічыцца тысячамі.
