Вы тут

Аляксандру Кныровічу скінулі год зняволення. Адвакат патрабаваў адмены прысуда

Фота: BEL.BIZ

16 кастрычніка Мінскі гарадскі суд разглядзеў апеляцыю бізнесмена Аляксандра Кныровіча. Адвакат патрабаваў для бізнесмена апраўдальнага прысуду. Суд не прыслухаўся да яго аргументаў і знізіў тэрмін зняволення Кныровіча ўсяго на год: з 6 да 5 гадоў.

Бацька Аляксандра Кныровіча кажа, што пытанні да следства ў яго застаюцца.

“Год ёсць год, улічваючы, што іншым хлопцам не знізілі нічога, — распавёў Еўрарадыё пасля апеляцыі Станіслаў Кныровіч. — Адвакат патрабаваў адмены прысуду, але, як ёсць. Можна шмат размаўляць на гэты конт. У бліжэйшыя дні будзе магчымасць сустрэцца с Аляксандрам, дазвол на сустрэчу ў мяне ў кішэні”.

Па словах бацькі бізнесмена, у лістах Аляксандр піша, што доўга рыхтаваўся да апеляцыі. На стан здароў’я прадпрымальнік не скардзіцца. У СІЗА Кныровіч робіць зарадку, чытае кнігі і газеты.

Аляксандр Кныровіч — беларускі прадпрымальнік, дырэктар групы кампаній “Сармат-СТІ”. Затрыманы 25 студзеня 2017 года. 4 ліпеня Мінскі гарадскі суд прызнаў Кныровіча вінаватым ва ўхіленні ад выплаты падаткаў у асабліва буйным памеры. Прадпрымальнік атрымаў шэсць гадоў пазбаўлення волі, з канфіскацыяй маёмасці і пазбаўленнем права займаць кіруючыя пасады цягам пяці гадоў.

Турэмныя тэрміны атрымалі і іншыя супрацоўнікі кампаніі “Сармат”. Намеснік дырэктара па эканоміцы Ігар Максімаў, намеснік дырэктара па продажах Яўген Папоўскі і вядучы эканаміст Андрэй Кускоў атрымалі па 4, 4 і 3 гады зняволення адпаведна. Іх прысуды пакінулі без змен.