Аляксандр Лукашэнка прыбыў з афіцыйным візітам у Кітай
У кіраўніка Беларусі запланаваны шэраг сустрэчаў з кіраўніцтвам Кітайскай Народнай Рэспублікі.
Як інфармуе БЕЛТА, Лукашэнка сустрэнецца са Старшынёй КНР Сі Цзіньпінам, прэм'ерам Дзяржаўнага савета Лі Кэцянам і старшынёй Усекітайскага камітэта Народнага палітычнага кансультацыйнага савета Юй Чжэншэнам. Падчас візіту плануецца падпісаць сумесную дэкларацыю і больш за 20 двухбаковых дамоваў, пратаколаў і кантрактаў.
Чальцы афіцыйнай беларускай дэлегацыі 15 ліпеня ў Пекіне ўжо правялі шэраг перамоў з кітайскімі калегамі, кіраўнікамі буйных кампаній і карпарацый. У прыватнасці, віцэ-прэм'ер Анатоль Тозік, міністр замежных спраў Уладзімір Макей і амбасадар Беларусі ў Кітаі Віктар Бура правялі сустрэчу з намеснікам міністра замежных спраў КНР Чэн Гапінам.
Таксама з прадстаўнікамі разнастайных ведамстваў і карпарацыяў сустрэліся старшыня Дзяржаўнага ваенна-прамысловага камітэта Сяргей Гурулёў, міністр прамысловасці Дзмітрый Кацярыніч, міністр энэргетыкі Уладзімір Патупчык.
Нагадаем, што беларускі кіраўнік наведваў Кітай шэсць разоў — у 1995, 1997, 2001, 2005, 2008 і 2010 гадах.
Фота — belarus.by
