Адміны чатаў, дзе пішуць сваякі вязняў, не вераць, што іх прызналі "экстрэмісцкімі"

Удзельнікі Viber- і тэлеграм-чатаў, якія аб'ядноўваюць сваякоў вязняў, не вераць, што іх прызналі "экстрэмісцкімі". Адна з прычынаў — тое, што пра гэта паведамляюць толькі незалежныя СМІ, якія блакуюць у Беларусі.

Як пішуць праваабаронцы MAYDAY, удзельнікі аднаго з такіх чатаў нават звярнуліся да інспектара крымінальна-выканаўчай інспекцыі, які курыруе нядаўна вызваленага асуджанага. У інспекцыі нічога крамольнага ў наяўнасці такіх чатаў не бачаць і здзівіліся, што іх залічылі ў "экстрэмісцкі спіс". У інспекцыі падкрэслілі, што гэта ініцыятыва не іх, а КДБ і параілі тэрмінова ліквідаваць чат і стварыць новы.

Тым часам адміністратары чатаў нярэдка ігнаруюць паведамленні аб прызнанні іх "экстрэмісцкімі", лічачы іх правакацыяй. Спасылкі на незалежныя СМІ трапляюць пад артыкул аб распаўсюдзе экстрэмісцкіх матэрыялаў. У чаце папраўчай калоніі (ПК) №15 выдалілі ўсіх удзельнікаў, якія папярэджвалі пра небяспеку.

У чаце ПК-1 адміністратары для "барацьбы з экстрэмістамі" забаранілі беларускую мову і публікацыю спасылак, а таксама папярэдзілі, што "будуць давацца адказы ў строгай адпаведнасці з законамі РБ". Там адмаўляюцца верыць, што перапіска ў чаце можа быць прызнаная экстрэмізмам. Паводле неафіцыйнай інфармацыі, сілавікі далі 10 дзён на выдаленне чатаў.

Між тым, удзельнікамі чатаў з'яўляюцца і супрацоўнікі калоній. Таму з пятніцы па просьбе адміністрацыі папраўчых устаноў асуджаныя сталі тэлефанаваць сваякам і папярэджваць, каб тыя выдаляліся з Viber-супольнасцяў. Асабліва гэта тычыцца магілёўскай ПК-15 і наваполацкай ПК-1.

Пры гэтым вязні патрабуюць ад сваякоў выдаліцца з чатаў нават з тых калоній, якія не прызнаныя экстрэмісцкімі. Праваабаронцы робяць выснову, што на ўсялякі выпадак такія званкі арганізаваныя ва ўсіх калоніях.