Мабільнае прыкладанне “Слоўнік з Зубрыкам” працуе па сістэме інтэрвальнага паўтарэння словаў па картках. Дзеці могуць пачуць словы, разгледзець карцінку, а потым — скласці слова з літар. Галоўны герой аплікацыі — Зубрык, які атрымлівае заахвочванне і пачастункі.
Стваральніца аплікацыі Алена Жук кажа, што ёй хацелася зрабіць так, каб вывучэнне мовы было не сумным і не гвалтоўным.
— Я і мае дзеці вывучаем мовы. Мы зразумелі, што для вывучэння беларускай мовы аплікацыі няма, і тым больш для дзяцей, такой цікавай, прыгожай, якой хацелася б карыстацца. Акрамя таго, мы пераехалі ў Польшчу, і тут, відавочна, дэфіцыт беларускай мовы, яе нестае.
Аплікацыя яшчэ ў распрацоўцы, але ёй можна карыстацца.
