ЗША ўсклалі на КНДР адказнасць за кібератаку з выкарыстаннем WannaCry
![ЗША ўсклалі на КНДР адказнасць за кібератаку з выкарыстаннем WannaCry](/sites/default/files/styles/gallery_main/public/2023-08/2017-12-19t012610z_2012872015_rc1ac8ddfc50_rtrmadp_3_usa-cyber-northkorea-bossert.jpg.webp?itok=Tb9kyY8q)
ЗША ўсклалі на КНДР адказнасць за кібератаку з выкарыстаннем WannaCry. У траўні 2017-га вірус-вымагальнік пашкодзіў больш за 300 тысяч камп'ютараў у 150 краінах свету (пацярпелі бальніцы, банкі, прадпрыемствы і ўстановы). Страты ацэньваюцца на мільярды долараў, інфармуе "Бі-Бі-Сі".
Абвінавачванні на адрас Паўночнай Карэі выказаў дарадца прэзідэнта Злучаных Штатаў па пытаннях нацыянальнай бяспекі Томас Босерт у артыкуле, які з'явіўся ў газеце Wall Street Journal. Ён сцвярджае пра існаванне пераканаўчых доказаў, што за кібератакай стаяць структуры, звязаныя з кіраўніцтвам КНДР. Вялікабрытанія і кампанія Microsoft, нібыта, таксама трымаюцца такога меркавання. Босерт заяўляе, што Пхеньян за гэта трэба прыцягнуць да адказнасці. ЗША, у сваю чаргу, будуць працягваць праводзіць "стратэгію максімальнага ціску" на дыктатарскі рэжым, каб у будучыні падобныя кібератакі не паўтараліся. Аднак якім канкрэтна будзе адказ, дарадца Дональда Трампа не ўдакладніў.
Як вядома, з-за ядзернай праграмы Паўночнай Карэі і ракетных выпрабаванняў на гэтую краіну накладзеныя сур'ёзныя эканамічныя санкцыі. ЗША ўключылі КНДР у спіс краін, якія падтрымліваюць тэрарызм на дзяржаўным узроўні.
![ЗША ўсклалі на КНДР адказнасць за кібератаку з выкарыстаннем WannaCry](/sites/default/files/paragraphs/image/2017-12-19t004805z2104744864rc1497ee8c60rtrmadp3usa-cyber-northkorea.jpg)