Затрыманы ў Івацэвічах расійскі вайсковец вярнуўся ў сваю часць — СМІ
Затрыманы Аляксандр Быкаў — першы злева / "Ганцавіцкі час"
Расійскага вайскоўца-кантрактніка Аляксандра Быкава, затрыманага ў Івацэвічах 17 чэрвеня, аштрафавалі і адпусцілі, піша сайт "Зеркало".
У раскладзе пасяджэнняў Івацэвіцкага суда прозвішча Быкава не з'яўлялася. Журналістка выдання затэлефанавала ў канцылярыю суда, назваўшыся сваячкай Быкава. Там ёй сказалі, што матэрыялы на такога чалавека ў суд не паступалі.
У мясцовым РАУС заявілі, што Аляксандр Быкаў ужо знаходзіцца ў вайсковай часці.
"Прыехалі яго камандзіры, забралі і адвезлі ў вайсковую часць. Усё нармальна, жывы-здаровы. Можаце жонцы яго патэлефанаваць, яна з'ехала дадому", — паведамілі міліцыянты. Яны дадалі, што судзіць Быкава не будуць: яму выпісалі штраф, які аплаціла жонка.
Як распавядала Еўрарадыё, 17 чэрвеня ў Івацэвічах затрымалі двух мужчын на аўтамабілі з расійскімі нумарамі і Z-сімволікай. Нагодай для затрымання стала п'янае кіраванне аўтамабілем.
Выявілася, што адзін з іх — 41-гадовы расійскі кантрактнік Аляксандр Быкаў. Ён служыць у 283-м мотастралковым палку 144-й гвардзейскай мотастралковай дывізіі 20-й гвардзейскай агульнавайсковай арміі. Верагодна, яго часць размяшчаецца недалёка ад Івацэвічаў, на Абуз-Лясноўскім палігоне.
Дарэчы, рэдактара сайта "Ганцавіцкі час" Паўла Дайліда, які першым апублікаваў навіну пра затрыманне, сёння выклікалі ў міліцыю — "на размову". Дайлід адмовіўся ехаць, бо не быў ні падазраваным, ні сведкам па справе.
