Заснавальніка баранавіцкай газеты "Шаг" затрымалі за каментары і пратэсты
Анатоль Вайцяхоўскі / фота з яго старонкі "Вконтакте"
У Баранавічах затрымалі прадпрымальніка Анатоля Вайцяхоўскага — колішняга заснавальніка баранавіцкай газеты "Шаг", піша "Наша Ніва".
Вайцяхоўскаму 55 гадоў. У 1996-м ён быў адным з заснавальнікаў газеты "Шаг", якая набыла вялікую папулярнасць: яе наклад дасягаў 11 тысяч асобнікаў. Цяпер газета ператварылася ў чыста рэкламную.
Пасля выбараў 2001 года Вайцяхоўскі сышоў з "Шага" і заснаваў іншае выданне — "Местная газета Шаг". Калі ўлады зачынілі "Белорусскую деловую газету" ў ліпені 2003 года, гэтае выданне на знак салідарнасці перадрукавала матэрыялы журналістаў "БДГ". За гэта баранавіцкую газету забаранілі друкаваць у Беларусі, а потым і зусім зачынілі.
Пасля гэтага Вайцяхоўскі заняўся прадпрымальніцтвам — медыцынскімі таварамі ды іншымі таварамі для здароўя.
Днямі яго затрымаў ГУБАЗіК. Мужчыну вінавацяць у тым, што ён пісаў у Тэлеграме каментары супраць расійскага ўварвання ва Украіну і гвалту сілавікоў. Таксама яго вінавацяць ва ўдзеле ў пратэстах 2020 года.
