За суткі УСУ выбілі расіян з 20 населеных пунктаў — 201-я раніца вайны
УСУ за пяць дзён вярнулі больш за 3000 квадратных кіламетраў тэрыторыі / facebook.com/GeneralStaff.ua
Украінскія войскі нанеслі Расіі буйную аператыўную паразу, адбіўшы амаль усю Харкаўскую вобласць у ходзе хуткага контрнаступлення, гаворыцца ў чарговай справаздачы Інстытута вывучэння вайны. Напярэдадні эксперты Інстытута пісалі, што за пяць дзён украінцы пацяснілі расіян у Харкаўскай вобласці на глыбіню да 70 кіламетраў і захапілі больш за 3000 квадратных кіламетраў тэрыторыі. Гэта больш, чым расійскія войскі захапілі за ўсе свае аперацыі з красавіка. Вызваленыя Балаклея, Купінск і Ізюм. "Вяртанне Украінай Ізюма паклала канец перспектыве таго, што Расія можа дасягнуць сваіх заяўленых мэтаў у Данецкай вобласці", адзначылі экперты. Больш таго, яны лічаць, што "Украіна пераламала ход гэтай вайны ў сваю карысць. Кіеў, верагодна, будзе ўсё больш дыктаваць месца і характар асноўных баявых дзеянняў, і Расія будзе ўсё больш неадэкватна рэагаваць на рост фізічнага і псіхалагічнага ціску з боку Украіны падчас наступных вайсковых кампаній, калі Масква не знойдзе які-небудзь спосаб вярнуць ініцыятыву".
Раней эксперты Інстытута пісалі, што "па стане на 10 верасня расійскія войскі, верагодна, больш не ўтрымліваюць ўсю Луганскую вобласць". Яны мяркуюць, што ўкраінскія сілы, верагодна, паміж 4 і 10 верасня захапілі Белагораўку.
Расійскія вайскоўцы і іх сем'і сышлі і з горада Сватава Луганскай вобласці, там засталіся толькі салдаты так званага "народнага апалчэння" з ліку мясцовых жыхароў. Пра гэта гаворыцца ў ранішняй зводцы Генштаба УСУ. Усяго ж, па дадзеных украінскага Генштаба, за суткі ўкраінскія вайскоўцы змаглі "выбіць ворага з больш чым дваццаці населеных пунктаў", ідзе узяцце іх пад поўны кантроль.
Ва ўкраінскім Генштабе падкрэсліваюць, што пагроза ўдараў захоўваецца па ўсёй тэрыторыі Украіны. За мінулыя суткі праціўнік нанёс 18 ракетных і 39 авіяўдараў па ваенных і грамадзянскіх аб'ектах. Пацярпелі больш за 30 населеных пунктаў. Быў нанесены ракетны ўдар па Харкаўскай ЦЭС і шэрагу аб'ектаў крытычнай інфраструктуры ў іншых рэгіёнах краіны. Без святла на час засталіся гарады і пасёлкі Харкаўскай, Днепрапятроўскай, Сумскай, Палтаўскай абласцей.
Электразабеспячэнне ў Харкаўскай вобласці адноўлена ў большасці населеных пунктаў, заявіў раніцай кіраўнік абласной адміністрацыі Алег Сінягубаў. Але ў выніку ўдару па "аб'екту крытычнай інфраструктуры" загінулі два работнікі. Яшчэ двое атрымалі раненні ў выніку аналагічнай атакі ў Чугуеўскім раёне вобласці.
Адна з ракет трапіла ў жылы дом у Харкаве. Дом часткова разбураны, адзін чалавек загінуў, двое пацярпелі. "Водазабеспячэнне ў Харкаве ўначы было адноўлена. Метро і наземны электратранспарт працуюць у штатным рэжыме", паведаміў раніцай мэр горада Ігар Церахаў.
Ноччу расіяне білі з "Ураганаў", "Градаў" і цяжкай артылерыі па Нікапальскім і Крыварожскім раёнах Днепрапятроўскай вобласці. У адным выпадку пашкоджаныя прыватныя дамы, ліцэй і электрасеткі, у другім — дома і газаправод. Людзі не пацярпелі, распавёў кіраўнік абласной адміністрацыі Валянцін Разнічэнка.
Прэзідэнт Украіны Уладзімір Зяленскі назваў вячэрнія абстрэлы расійскіх войскаў па грамадзянскіх аб'ектах крытычнай інфраструктуры ва Украіне тэрарыстычным актам. Пра гэта ён напісаў у сацсетках.
"Вы да гэтага часу думаеце, што зможаце нас напалохаць, зламаць, схіліць да саступак? Вы сапраўды так нічога і не зразумелі? Не зразумелі, хто мы? За што мы? Аб чым мы? [...] Холад, голад, змрок і смага — для нас не так страшна і смяротна, як вашы "сяброўства і братэрства", — заявіў Зяленскі.
Ён дадаў, што Украіна будзе з газам, святлом, вадой і ежай і без Расіі.
А ў традыцыйным звароце Зяленскі падвёў вынікі 200 дзён поўнамаштабнай вайны. Ён падзякаваў украінскім абаронцам і адзначыў, што ўкраінцам за гэты час нямала ўдалося. Але "самае важнае, а таму самае цяжкае — наперадзе".
Расейскі прэзідэнт Уладзімір Пуцін даручыў дзяржаўным карпарацыям і алігархам ствараць прыватныя вайсковыя кампаніі для ўзмацнення ўзброенай агрэсіі супраць Украіны і "новага этапу" вайны. Пра гэта піша ўплывовы журналіст-даследчык Хрыста Грозеў у Twitter. Паводле ягоных звестак, Пуцін хоча пачаць "новы этап баёў" у кастрычніку.
"Ён кажа, што ўсё з-за карупцыі і некампетэнтнасці ў арміі ("наймітаў падманулі з заробкам"). Але зноў жа вельмі аптымістычна, кажа, што кожнай дзяржаўнай карпарацыі і алігарху загадана стварыць уласную ПВК для "новага этапу ў кастрычніку", – напісаў Грозеў.
Грэцыя не будзе перадаваць Украіне зенітна-ракетныя комплексы С-300. Аб гэтым заявіў прэм'ер-міністр гэтай краіны Кірыакас Міцатакіс. Сваю пазіцыю ён патлумачыў тым, што Афіны гатовыя падтрымліваць Украіну, але не могуць аслабляць абарону Грэцыі. Краіна гатовая аддаць Кіеву старыя грэчаскія БМП - 1 пры замене іх нямецкімі бронемашынамі тыпу Marder1A3. Перамовы па гэтым пытанні яшчэ ідуць, піша Protothema.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.