За нядзелю 42 штрафы — дачнікаў пад Гомелем пазбавілі адпачынку ля сажалкі
![Сажалка каля вёскі Цыкуны](/sites/default/files/styles/gallery_main/public/2024-09/snimok_ekrana_2024-09-03_110250.png.webp?itok=Tb--tVpR)
Сажалка каля вёскі Цыкуны / sozhnews.by
На лецішчах у вёсцы Цыкуны Гомельскага раёна ўзнік канфлікт вакол сажалкі. Мясцовым жыхарам забаранілі там купацца. Афіцыйная версія — небяспечна, у канцы чэрвеня там патануў чалавек, а 14 жніўня на беразе ўсталявалі шыльды аб забароне купання. Але людзі, нягледзячы на забарону, працягвалі купацца. У мінулую нядзелю за несанкцыянаванае плаванне аштрафавалі 42 чалавекі, піша "Флагшток".
Высветлілася, што міліцыю на купальшчыкаў выклікала дачніца Валянціна Гусева. Яна кажа, не хоча, каб "у месцы, дзе ў яе лецішча, хавалі тапельцаў".
"Таму прыняла рашэнне: еду — нехта ў вадзе, выклікаю ўчастковага", — заявіла жанчына. Рэсурс высветліў, што жанчына з'яўляецца сястрой Віктара Крата, аднаго з заснавальнікаў прыватнага прадпрыемства ТАА "Грынплейс". Гэта прадпрыемства ўзяло сажалку ў арэнду і ўсяляк падтрымлівае забарону на купанне.
На нядаўняй сустрэчы з прадстаўнікамі мясцовых уладаў і арандатарам вадаёма дзясяткі дачнікаў выстраіліся ўздоўж берага сажалкі і скандавалі: "Не арэндзе!" Мясцовыя выступаюць супраць абмежаванняў, якія з'явіліся пасля арэнды вадаёма, яны сабралі ўжо каля 600 подпісаў.
Праблемы пачаліся яшчэ ў 2021 годзе. Але тады мясцовыя жыхары адстаялі вадаём ад забудовы. Зараз жа "Грынплейс" ужо пачаў работы па зачыстцы берагавой лініі. Сажалку плануюць прыстасаваць для аказання платных паслуг "рэкрэацыйнага рыбаводства".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.