За абразу Лукашэнкі асудзілі беларуса, дачка якога загінула пры абстрэле Кіева
Аляксандр Патапаў / фота з старонкі ў "Аднакласніках"
Два гады калоніі агульнага рэжыму — такі прысуд атрымаў віцяблянін Аляксандр Патапаў за эмацыйныя каментары ў сацсетцы "Аднакласнікі", пішуць праваабаронцы з MAYDAY.
Прысуд 68-гадоваму мужчыну вынесла 15 лістапада суддзя Віцебскага раёна Наталля Траццякова.
Патапаў — грамадзянін Беларусі, з 1997 года жыве ў Віцебскім раёне. Раней быў судзімы. Сваякі Патапава жывуць ва Украіне. Падчас рускага абстрэлу Кіева загінула ягоная дачка, а непаўналетняя пляменніца страціла нагу.
Бядуючы ад гэтых стратаў, Патапаў 8 і 16 ліпеня напісаў у "Аднакласніках" два каментары. Ён адрэагаваў на запуск ракет з тэрыторыі Беларусі ў бок Украіны і пры гэтым згадаў Аляксандра Лукашэнку.
25 жніўня мужчыну ўзялі пад варту і абвінавацілі ў абразе Лукашэнкі (ч. 1 арт. 368 КК).
Суддзя пыталася ў яго: “Як вы звязвалі існаванне прэзідэнта Лукашэнкі з тым, што ў вас у сям'і здарылася?”.
На судзе Патапаў цалкам прызнаў віну.
