З Кіпра ў Беларусь экстрадавалі жанчыну, якую шукалі па лініі Інтэрпола
З Кіпра ў Беларусь экстрадавалі жанчыну, якую шукалі па лініі Інтэрпола (ініцыятарам выступіла Цэнтральнае РУУС беларускай сталіцы). Як інфармуе прэс-служба МУС, 42-гадовую беларуску даставілі ў Нацыянальны аэрапорт “Мінск” рэйсам з Ларнакі. Яе абвінавачваюць у незаконных дзеяннях, накіраваных на працаўладкаванне грамадзян за мяжой.
Паводле дадзеных праваахоўнікаў, у 2000-2004 гадах жанчына ашуканскім чынам завербавала не менш за 19 беларусак з мэтай іх сэксуальнай эксплуатацыі ў начных клубах Швейцарыі і Кіпра. Пры гэтым яна дзейнічала па папярэдняй змове з замежнымі грамадзянамі. Беларускам абяцалася праца танцоўшчыцамі і высокія заробкі, пра прастытуцыю гаворкі не было. Спецыяльна адбіраліся беспрацоўныя і малазабяспечаныя дзяўчаты, якія раней не бывалі за мяжой, і якіх было прасцей увесці ў зман.
Копіі дакументаў завербаваных жанчына перадавала замежнікам для ацэнкі знешнасці. Пасля адабраных кандыдатак яна адвозіла ў аэрапорт. За кожную “танцоўшчыцу” атрымлівала ганарар. Беларускі, якія траплялі за мяжу, заключалі працоўныя замовы, пасля чаго ім паведамлялі сапраўдныя патрабаванні — аказанне інтымных паслуг кліентам клубаў за ўзнагароджанне. Калі тыя адмаўляліся, яны заставаліся без заробку, харчавання, галадалі, у іх патрабавалі выплаты кампенсацыі. Некаторыя дзяўчаты пагаджаліся на прапанаваную ім працу.
Абвінавачаная была затрыманая ў жніўні 2015 года на Кіпры. Каб пазбегнуць экстрадыцыі, яна звярталася ў суды розных інстанцый. У выніку экстрадыцыя адбылася толькі праз два з паловай гады. Увесь гэты час беларуска знаходзілася пад вартай. У Беларусі ёй пагражае да 8 гадоў пазбаўлення волі з канфіскацыяй маёмасці.
