З 10 ліпеня абітурыентам выдаюць сертыфікаты ЦТ

З 10 ліпеня беларускім абітурыентам сталі выдаваць сертыфікаты цэнтралізаванага тэставання 2019. Іх можна атрымаць у пунктах, дзе было пройдзена ЦТ.

За сертыфікатамі трэба прыходзіць з пасведчаннем асобы і пропускам па вучэбным прадмеце з пазнакай "Тэставанне прайшоў", паведамляе сайт Рэспубліканскага інстытута кантролю ведаў.

Сёлета цэнтралізаванае тэставанне ў Беларусі праходзіла каля 77 тысяч чалавек. Самымі папулярнымі прадметамі сталі руская мова і матэматыка.

Атрымаць 100 балаў па ўсіх трох тэстах у 2019 годзе не атрымалася ні ў кога. Ёсць абітурыенты, якія атрымалі па дзве "соткі" — іх 12 чалавек (летась было 16). У 2018 і 2017 годзе абсалютных выдатнікаў з трыма стабальнымі тэстамі таксама не было.

У гэтым годзе па ініцыятыве Міністэрства адукацыі была змененая сістэма ацэнкі вынікаў цэнтралізаванага тэставання. Выкладчыкі забілі трывогу: маўляў, новая сістэма дае перавагі двоечнікам. Кіраўнік праекта "Народны падручнік" Сяргей Альшэўскі пайшоў на прынцып: метадам тыка здаў цэнтралізаваныя тэставанні па матэматыцы, рускай і кітайскай мове і ўсюды набраў прахадны бал! Тэст па кітайскай мове ён здаваў, не ведаючы ні слова, і атрымаў 34 балы са 100.