Вызвалілі Алега Рудакова і яго жонку, але ім пагражае экстрадыцыя ў Расію
![Алег Рудакоў з жонкай Вольгай ](/sites/default/files/styles/gallery_main/public/2023-09/rudakovy.jpg.webp?itok=S8TcIsoo)
Алег Рудакоў з жонкай Вольгай / facebook.com
Былы кіраўнік таварыства беларускай культуры ў Іркуцку Алег Рудакоў і яго жонка Вольга выйшлі на волю пасля 30 сутак адміністрацыйнага арышту. Але ім сказалі рыхтавацца да новага суда, на гэты раз па экстрадыцыі ў Расію, грамадзянамі якой яны з'яўляюцца.
Рудаковых затрымалі ў вёсцы Бяздзедавічы Полацкага раёна 24 жніўня і судзілі за "распаўсюд экстрэмісцкіх матэрыялаў" — за каментары ў інтэрнэце.
Алег Рудакоў нарадзіўся ў Беларусі, але больш за 30 гадоў пражыў у Расіі, стварыў і на працягу 17 гадоў узначальваў у Іркуцку таварыства беларускай культуры імя Яна Чэрскага. У 2020-м ён канчаткова вярнуўся ў Беларусь (перад гэтым даў інтэрв'ю). Яго жонка Вольга вядзе майстар-класы па традыцыйным беларускім гафце ў полацкім Музеі традыцыйнага ручнога ткацтва Паазер'я.
Вясной 2010-га ўказам Аляксандра Лукашэнкі Рудакоў быў узнагароджаны мэдалём Францыска Скарыны "за заслугі ва ўмацаванні культурных сувязяў паміж Беларуссю і Расіяй, вялікі асабісты ўнёсак у захаванне традыцый беларускай культуры".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.