Вы тут

Выказваем заклапочанасць: вы не бачыце навін з Афганістана, а іх шмат

Кароткі агляд сусветных навін / Еўрарадыё

Жанчынам у Афганістане лепш схавацца дома, але калі яны жанчыны-суддзі, то дома ім не схавацца. У рэгулярным аглядзе Еўрарадыё расказваем пра самыя галоўныя і далёка не самыя галоўныя навіны свету.
 

Жанчыны-суддзі на ўцёках

Масума была ў Афганістане суддзёй. Цяпер яна на ўцёках, а Масума — не сапраўднае яе імя, а псеўданім, пад якім яна пагадзілася пагаварыць з журналістамі ВВС.

За сваё жыццё Масума асудзіла сотні мужчын за гвалт у адносінах да жанчын. Вінаваты ў згвалтаванні, забойствах, катаваннях — усё гэта яе прысуды.

Калі "Талібан" прыйшоў да ўлады, турмы адчыніліся. Масума пачала атрымліваць эсэмэс, галасавыя паведамленні, уваходныя званкі з невядомых нумароў. Суддзі пагражалі смерцю. У тую ж ноч яна ўцякла са свайго горада і да гэтага часу хаваецца. Як і яшчэ 220 жанчын-суддзяў.

Некалькі месяцаў таму Масума асудзіла чалавека на 20 гадоў пазбаўлення волі за жорсткае забойства жонкі.

"Пасля таго як справа была скончаная, злачынец падышоў да мяне і сказаў: "Калі я выйду з турмы, я зраблю з вамі тое, што я зрабіў са сваёй жонкай".

Тады Масума не надала значэння гэтым пагрозам. А праз некалькі месяцаў талібы адчынілі дзверы турмаў.

 

"Іх норавы"

Мы ўжо расказвалі вам пра тысячы мігрантаў на мяжы Мексікі і ЗША. Многія з гэтых людзей — выхадцы з Гаіці, краіны, у якой да крызісу эканомікі і аховы здароўя дадаўся яшчэ і палітычны. Гэтыя людзі пераадолелі найскладанейшы ў свеце пераход, каб апынуцца на амерыканскай мяжы. І многіх з іх ужо пасадзілі ў самалёт і адправілі дадому.

Выслалі ўжо каля 4 тысяч чалавек, затрыманых памежнай службай у штаце Тэхас.

Неабраны лідар Гаіці Арыэль Генры хоча наладжваць адносіны з ЗША і кажа, што разумее амерыканскую адміністрацыю. Краіна будзе вітаць вяртанне тых, хто ўцёк адсюль 12 гадоў таму пасля катастрафічнага землятрусу.

Праблема толькі ў тым, што, калі гаіцяне вярнуліся дадому, яны даведаліся: на іх радзіме стала яшчэ больш небяспечна, чым было. У сталіцы — усплёск гвалту, і банды трымаюць горад у страху. А гэта ўжо не проста эканамічныя праблемы.

 

Які чалавек у Брытаніі самы патрэбны

Асцярожна, гэтая навіна можа выклікаць востры прыступ настальгіі па 2011-м.

На запраўках Брытаніі чэргі. У выходныя яны выраслі на 500%! Прычына не ў тым, што не стае паліва — з ім усё ў норме. Прычына ў тым, што не стае кіроўцаў цыстэрнаў, якія развозілі б гэта паліва па запраўках.

Вы спытаеце: а пры чым тут настальгія па 2011-м? Улады сказалі, што ў крызісе вінаватыя ў тым ліку самі кіроўцы, якія сталі ў чаргу, каб купіць паліва, якое вось-вось можа стаць дэфіцытным, у запас.

Але на самай справе і іншай праблемы не адмаўляюць: у краіне велізарныя складанасці з кіроўцамі. Бракуе тысяч чалавек! Прычына і ў "брэксіце", і ў пандэміі: кіроўцы-замежнікі лічаць за лепшае працаваць бліжэй да дому. Ёсць і іншыя прычыны: кіроўцы ідуць на пенсію ў 55 гадоў, а ўмовы працы — не самыя прывабныя, вось новыя кіроўцы і не прыходзяць на працу.

Але цяпер гэтым, здаецца, зоймуцца грунтоўна, кожны раз войска прыцягваць не будзеш. Спачатку ўлады выдадуць 5 тысяч часовых віз кіроўцам-замежнікам. А тым часам будуць думаць, як кардынальна развязаць праблему.

Брытанцы, дарэчы, паніку ўжо адставілі. Чэргі зноў меншаюць.

 

Кубак вады будзе каму падаць. Але не бясплатна

Французскія "макдональдсы" становяцца на шлях zero-waste. Больш ніякай вады ў пластыкавых бутэльках. Хочаце вады — вам наліюць з-пад крана ў кардонны кубак. Само сабой, гэтая вада ўжо прабегла праз некалькі фільтраў. Так можна пазбегнуць больш як тысячы тон пластыкавых адходаў, кажуць у кампаніі.

Толькі заплаціць за такую ваду трэба будзе 2,3 еўра. Намеснік мэра Парыжа, які адказвае за водазабеспячэнне, быў крыху збянтэжаны. Кошт водаправоднай вады ў Парыжы — 0,003 еўра за літр. У "Макдональдсе" — ну, трохі даражэй.

Прадстаўнік "Макдональдс" сказаў, што для таго, каб ачысціць ваду на "99,99%", патрэбныя ўсё ж пэўныя інвестыцыі. І з аднаго боку, усё правільна. Але ў Нацыянальнай асацыяцыі спажыўцоў сказалі, што хоць і юрыдычна правільна, але ўсё роўна крыху крыўдна.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.