Ва Украіне выпусцілі канверт, прысвечаны Алесю Бяляцкаму
Канверт і марка з Украіны, прысвечаныя Беларусі / hpravy.org
Спецыяльны канверт, прысвечаны нобелеўскаму лаўрату прэміі міру Алесю Бяляцкаму, выпусцілі ва Украіне, паведамляе "Гарадзенская праваабарона".
Адначасова выйшла і марка, прысвечаная Беларусі ў сувязі з Нобелеўскай прэміяй для праваабаронцы.
Ініцыятарам такога выдання стаў грамадскі дзеяч з Тэрнопаля Уладзімір Ханас. Па яго словах, ва Украіне дастаткова патрыятычных марак, сусветны розгалас выклікаў знакаміты "Рускі карабель". У Беларусі такой прадукцыі няма. "Таму мы вырашылі выпусціць праект маркі з беларускай сімволікай. Пасля абмеркаванняў вырашылі абраць стылізаваны варыянт адной з першых марак незалежнай Беларусі з гербам "Пагоня", — тлумачыць Ханас. Канверты і маркі ён называе своеасаблівым сімвалам падтрымкі і салідарнасці з беларускім народам.
