Успышка каранавіруса ў Іране: відавочцы — пра тое, што цяпер адбываецца
![Каранавірус у Іране / Reuters](/sites/default/files/styles/gallery_main/public/2023-08/rts344zw.jpg.webp?itok=XuYCZdHg)
Каранавірус у Іране / Reuters
Іран — у спісе краін з найбольш небяспечнай сітуацыяй па новым каранавірусе. Лік заражэнняў перавысіў 3000, вірус распаўсюдзіўся па ўсёй дзяржаве і атакаваў нават членаў урада. Але калі сюжэты пра тое, як з праблемай спраўляюцца італьянцы і кітайцы, мы бачым кожны дзень, то пра арабскую рэспубліку інфармацыі зусім няшмат. Пры гэтым хуткасць распаўсюджвання віруса і колькасць смерцяў (ужо 92) ад COVID-19 у гэтым рэгіёне — палохаюць.
Еўрарадыё звязалася з жыхарамі Ірана і распытала пра тое, як народ рэагуе на сітуацыю, якая склалася і якія захады робіць урад.
"Не хапае ахоўных касцюмаў для дактароў"
Аіда — іранка па нацыянальнасці — ужо некалькі гадоў пражывае ў Беларусі. У Іране ў яе засталіся сваякі і сябры, якія штодня дзеляцца з ёй навінамі пра COVID-19. Па словах дзяўчыны, калі спачатку іранцы да праблемы паставіліся несур'ёзна, то цяпер на вуліцах адчуваецца паніка:
![Вспышка коронавируса в Иране: очевидцы — о том, что сейчас происходит](/sites/default/files/styles/round_photo/public/paragraphs/round_photo/aida0503.jpg.webp?itok=3L51lgVc)
— Калі яны даведаліся, што вірус распаўсюдзіўся па ўсіх гарадах, то пачалі закупляць маскі і прадукты. Ежа, дарэчы, пасля гэтага падаражэла. Людзі стараюцца сядзець дома і нікуды не выходзіць. Мае сяброўкі пісалі, што школы не працуюць ужо два тыдні і да траўня будуць дакладна закрытыя. Таксама вельмі шмат хто вырашыў не працаваць і нікуды наогул не выходзіць, дома ўсе стараюцца часта рабіць вільготную прыборку. У крамах і іншых грамадскіх месцах перад уваходам правяраюць тэмпературу, кажуць скарыстацца антыбактэрыяльным гелем. Ведаю, што ў бальніцах цяпер вельмі складаная сітуацыя. Дактарам не стае ахоўных касцюмаў, — расказала Еўрарадыё Аіда.
У Тэгеране стала ціха, машын на вуліцах амаль няма
Фархад — інжынер з Тэгерана, іранскай сталіцы. Паводле яго слоў, за апошнія некалькі тыдняў горад вельмі змяніўся:
— У сталіцы жыве 15 мільёнаў чалавек. Заўсёды тут былі заторы, а цяпер у горадзе стала вельмі ціха і машыны па вуліцах ездзяць рэдка. Многія ўвогуле з'ехалі з Тэгерана ў невялікія вёскі, гарады, каб пазбегнуць заражэння. Крамы працуюць, але людзі стараюцца заказваць прадукты па інтэрнэце. Рэстараны адкрыты, але наведвальнікаў там няма.
![Вспышка коронавируса в Иране: очевидцы — о том, что сейчас происходит](/sites/default/files/paragraphs/image/tegeran0503.jpg)
Наш суразмоўца таксама расказаў, што кожная вобласць Ірана цяпер пазначана чырвоным, жоўтым ці белым колерам — у залежнасці ад распаўсюджання новага каранавіруса. "Чырвоныя" вобласці (іх пакуль што дзве) знаходзяцца на каранціне: там не прымаюць гасцей, закрыты гасцініцы, людзей правяраюць на ўездзе і выездзе з гарадоў.
![Вспышка коронавируса в Иране: очевидцы — о том, что сейчас происходит](/sites/default/files/styles/round_photo/public/paragraphs/round_photo/farhad0503.jpg.webp?itok=15k1iKMp)
— Я не магу сказаць, што дзяржава хавае нейкую інфармацыю. Цяпер дзякуючы інтэрнэту гэта зрабіць немагчыма, усе пра ўсё ведаюць. Кожны дзень мы атрымліваем інфармацыю з парадамі ад Мінздароўя, як змагацца з каранавірусам. Таксама ёсць спецыяльныя праграмы, дзе мы фіксуем свой стан здароўя, — гэтая інфармацыя адпраўляецца ў спецыяльны цэнтр. Там вырашаюць, ёсць у цябе сімптомы каранавіруса ці не. Нястачы лекаў не адчуваецца, не хапала толькі масак і антысептыкаў. Многія бальніцы вызвалілі спецыяльна для пацыентаў, інфікаваных новым каранавірусам. Дактары працуюць і днём і ноччу, але імкнуцца захоўваць пазітыў: здымаюць відэа, дзе спяваюць і танцуюць. У нас такі народ, мы стараемся падтрымліваць адно аднаго.
"Эвакуацыя беларусаў не плануецца"
Мы пацікавіліся ў пасольстве Беларусі ў Іране, колькі беларусаў цяпер знаходзіцца ў ісламскай рэспубліцы.
— Дакладную лічбу беларусаў, якія пражываюць у Іране, назваць складана, на консульскім уліку знаходзяцца 12 чалавек. Што да сітуацыі з каранавірусам, то іранскія ўлады абмежавалі наведванне месцаў масавага збору людзей, уся культурная праграма адменена, ніякіх семінараў і сімпозіумаў не праводзіцца, скарочаны працоўны дзень. Усе захады накіраваныя на тое, каб людзі не пераносілі інфекцыю, — расказалі Еўрарадыё ў пасольстве Беларусі ў Іране.
Эвакуацыя беларусаў з Ірана пакуль не плануецца, дадалі ў пасольстве.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.