Улады Беларусі — пра даклад ААН пра рэпрэсіі 2020 года: хлусня і паклёп
![Беларускія дыпламаты абурыліся дакладам пра парушэнні правоў чалавека / mfa.gov.by](/sites/default/files/styles/gallery_main/public/2023-08/mzs-1703.jpg.webp?itok=1atcskqm)
Беларускія дыпламаты абурыліся дакладам пра парушэнні правоў чалавека / mfa.gov.by
Хлуснёй і паклёпам пра Беларусь і яе ўлады назвала пастаяннае прадстаўніцтва Беларусі пры Аддзяленні ААН і іншых міжнародных арганізацыях у Жэневе даклад аб парушэннях правоў чалавека ў Беларусі ў кантэксце выбараў 2020 года. Даклад быў падрыхтаваны Упраўленнем Вярхоўнага камісара ААН па правах чалавека і апублікаваны 17 сакавіка 2023 года.
"І прэс-рэліз, і даклад працягваюць тыражаваць хлусню і паклёп пра Беларусь і яе ўлады. Даклад служыць інструментам для лабіявання антыбеларускага парадку заходніх краін у ААН і Савеце правоў чалавека. УВКПЧ працягвае абараняць тых, хто не змог падарваць беларускую дзяржаву і незаконна захапіць уладу ў 2020 годзе, удзельнічаючы ў масавых беспарадках, накіроўваючы антыўрадавыя пратэсты, распальваючы нянавісць у грамадстве, ужываючы гвалт і пагрозы ў дачыненні да прадстаўнікоў праваахоўных органаў, дзяржаўных службовых асоб, прадзяржаўных журналістаў", — цытуе БЕЛТА словы беларускіх дыпламатаў.
Яны падкрэслілі, што многія з ахвяраў і сведкаў, згаданых у дакладзе, "былі прыцягнутыя да адказнасці за канкрэтныя злачынствы".
Пры гэтым дыпламаты не сталі абвяргаць факты, прыведзеныя ў дакуменце.
Даклад ААН па парпушэнні правоў чалавека ў Беларусі ў 2020 годзе грунтуецца на інтэрв'ю з 207 пацярпелымі ад сілавікоў і сведкамі. Яго аўтары прааналізавалі больш за 2,5 тысячы доказаў, уключаючы фатаграфіі, відэа, медыцынскія і судовыя пратаколы. Як перадавала Еўрарадыё, некаторыя з зафіксаваных парушэнняў могуць быць прыроўненыя да злачынстваў супраць чалавечнасці.
Абмеркаванне дакладу ў Савеце правоў чалавека адбудзецца 22 сакавіка.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.