Украінскія войскі працягваюць вызваляць населеныя пункты на шляху да Херсона

Украінскія войскі вызваляюць населеныя пункты на шляху да Херсона. Як і было аб'яўлена напярэдадні міністрам абароны РФ Сяргеем Шайгу, расійскія войскі паступова адыходзяць за Днепр. Але баі працягваюцца.

"За кожным так званым "жэстам добрай волі" праціўніка стаяць каласальныя намаганні нашых войскаў, — піша галоўнакамандуючы Узброеных сіл Украіны генерал Валерый Залужны. — Гэтак жа, як вораг адыходзіў ад Кіева і Харкаўскай вобласці, пакідаў востраў Змяіны, верагодны выхад з Херсона — гэта вынік нашых актыўных дзеянняў".

Залужны нагадаў, што на Херсоншчыне ўкраінскае войска разбурыла лагістычныя шляхі расіян і іх сістэму забеспячэння, парушылі сістэму кіравання войскамі. І прымусілі іх да ўцёкаў. "Мы працягваем вядзенне наступальнай аперацыі ў адпаведнасці са сваім планам", — падкрэслівае Залужны.

Сярод вызваленых за апошнія дні населеных пунктаў — Снігурыўка ў Мікалаеўскай вобласці, Праўдзіна, Кісялёўка, Каліноўскае, Брускінске, Баразенскае ў Херсонскай. Ужо з'явілася відэа адтуль, як украінскіх байцоў вітаюць мясцовыя жыхары.