Украінская выведка: расіяне плануюць тэракт на Беларускай АЭС
Беларуская АЭС у Астраўцы / Еўрарадыё
Расіяне плануюць тэракты на Беларускай АЭС і аб'ектах крытычнай інфраструктуры. А вінаваціць у "інцыдэнтах" будуць грамадзянаў краінаў NATO і Украіны. Пра гэта паведамляе Галоўнае ўпраўленне разведкі Міністэрства абароны Украіны.
Месца "правядзення" верагодных "інцыдэнтаў" — тэрыторыі, якія прымыкаюць да межаў краінаў Еўрасаюза і Украіны. У першую чаргу — Гродзенская і Брэсцкая вобласці. Адна з галоўных мэтаў — беларуская атамная электрастанцыя ў Астраўцы. Выканаўцаў тэрактаў пераапрануць у беларускую ваенную форму, сцвярджаюць у ГУР.
Па дадзеных украінскай разведкі, распрацоўкай і рэалізацыяй "праекта" займаюцца расійскія спецслужбы, а беларускаму КДБ "пра гэта проста паведамілі".
